2022 жылы Мемлекет басшысының тапсырмасына сәйкес «Келешек мектептер» ұлттық жобасы іске асырыла бастады. Бұл — еліміздің барлық өңірлерінде білім беру жағдайларын түбегейлі жақсартуға бағытталған ауқымды бастама.
🇰🇿1 қыркүйек – Білім күні қарсаңында Іле ауданы Ащыбұлақ ауылдық округі Мұхамеджан Түймебаев елді мекенінде 900 орынға лайықталған №3 жалпы білім беретін мектептің салтанатты ашылу рәсімі өтті.
Аталмыш білім ордасы Мемлекет басшысы Қасым-Жомарт Тоқаевтың тапсырмасымен жүзеге асып отырған «Келешек мектептері» ұлттық жобасы аясында бой көтерді.
Жаңа білім ұясының салтанатты ашылу рәсіміне қатысқан Іле ауданының әкімі Қайыржан Жақсымбетов, «AMANAT» партиясы Алматы облыстық филиал төрағасының орынбасары Аслан Кубентаев, Алматы облысының білім басқармасының басшысы Арайлым Толеубековна, ««KazSMU» құрылыс компаниясы бойынша жоба жетекшісі Дильяра Сейтнурова және компания өкілдері ұстаздар мен оқушыларды Білім күнімен құттықтап, бұл бастаманың маңыздылығына ерекше тоқталды.
Аудан басшысы жиналған жұртшылықты еңселі де сәулетті мектептің ашылуымен құттықтап, ізгі тілегін жеткізді. «Президентіміз «Орта білімнің сапасы – табысты ұлт болудың тағы бір маңызды шарты. Әрбір оқушының білім алып, жан-жақты дамуы үшін қолайлы жағдай жасалуға тиіс. Сол үшін «Келешек мектеп» ұлттық жобасы қолға алынды» деген болатын.
Жаңа мектептердің ашылуы – бұл жай ғанағимараттардың салынуы емес, жаңа дәуірде білім алатын оқушыларға жаңа мүмкіндіктер сыйлау, – деді қатысқан Іле ауданының әкімі Қайыржан Жақсымбетов.
– Білім – ел болашағының алтын діңгегі. Соңғы жылдары елімізде білім саласын дамытуға айрықша көңіл бөлініп келеді. Соның айқын дәлелі – Мемлекет басшысының бастамасымен қолға алынған «Келешек мектептері» жобасы. Бұл жоба – жай ғана жаңа ғимараттар салу емес, сапалы білім беру жүйесін қалыптастыруға бағытталған кешенді реформа. Биылғы оқу жылы қарсаңында Алматы облысында 8 жаңа мектептің пайдалануға берілуі – осы бастаманың нақты нәтижесі. Бұл тек өңір үшін емес, бүкіл ел үшін маңызды оқиға, – деді Алматы облыстық филиал төрағасының орынбасары Аслан Кубентаев.
Сонымен қатар, салтанатты жиында ардагер ұстаз аудандық қоғамдық кеңес мүшесі Гүльнар Жайлаубаева сөз сөйлеп, қуанышты сәтпен бөлісті. Ал оқушылар жаңа мектеп табалдырығын шаттықпен аттап, алғашқы қоңырау сыңғырымен білім әлеміне қадам басты.
Жаңа мектеп заман талабына сай толық жабдықталған. Жалпы аумағы 3 гектарды қамтитын үш қабатты нысанда 215 орындық акт залы, заманауи шеберхана, кең көлемді кітапхана, 255 орындық асхана, спорт залы, медициналық кабинет және бейнебақылау жүйелері қарастырылған. Бұл – оқушылардың қауіпсіздігі мен сапалы білім алуы үшін жасалған маңызды қадам. Мұғалімдер үшін де барлық жағдай жасалған: әдістемелік кабинеттер, демалыс аймақтары және цифрлық құралдармен жабдықталған жұмыс кеңістіктері қолжетімді.
Жаңа мектептің ашылуы Мұхамеджан Түймебаев елді мекені ғана емес, жалпы аудан тұрғындары үшін үлкен қуаныш. Бұл игі іс білім сапасын арттырып, жас ұрпақтың келешегіне сенімді негіз болары сөзсіз.
Алматы облысында жоба аясында 26 заманауи мектептің құрылысы қарастырылған, оның 24-і ауылдық жерлерде.
Бұл — ауылдық елді мекендердегі білім сапасын арттыруға бағытталған стратегиялық маңызды қадам.
Жалпы алғанда, «Келешек мектептері» жобасы — бұл жай ғана жаңа ғимараттар салу емес. Бұл — еліміздің болашағына жасалған инвестиция, әрбір баланың тұрғылықты жеріне қарамастан сапалы және қолжетімді білім алуына жол ашатын стратегиялық шешім.
Жаңа мектептер — бұл жаңа мүмкіндіктер, ата-аналардың сенімі және өңірлер дамуының берік іргетасы.
