Мемлекет басшысы Қасым-Жомарт Тоқаев бүгін Елордада өтіп жатқан Халықаралық волонтерлер форумына арнайы қатысып, сөз сөйледі. Жиында өз өмірін өзгелерге арнап, альтруизмнің жарқын үлгісін көрсетіп жүрген жандарды Президент бейбітшілік пен мейірімнің шын елшісі деп атады. 20 маусымда басталған форумға халықаралық ұйымдардың өкілдері, еліміздің әр өңірінен және шет елдерден еріктілер арнайы келді. Форумның екінші күні сөйлеген Қазақстан президенті еліміздегі волонтерлік қызметтің ауқымы кеңіп, жан-жақты дамып келе жатқанын, енді қазақстандық еріктілер халықаралық қозғалыстарға белсенді қатысуы қажет екенін айтты.
«Бүгінгі форумға еліміздің әр түкпірінен және шет елдерден еріктілер арнайы келіп отыр. Халықаралық ұйымдардың өкілдері, мәртебелі меймандар қатысып отыр. Бәріңізге шынайы ризашылығымды білдіремін. Кешеден бері өзекті мәселелер талқыланды. Жиынға қатысушылар ой-пікірлерін ортаға салды, ұтымды ұсыныстар айтты. Тиімді жобаларын таныстырып, тәжірибе бөлісті. Мұның бәрі игі істерді жалғастыруға зор мүмкіндік береді», – деді Президент.
Мемлекет басшысы бұған қоса елде еріктілер қозғалысының дамуына мемлекет қажетті жағдай жасап отырғанын, жеке өзі еріктілердің жұмысын жоғары бағалап, барынша қолдайтынын айтты.
Ол волонтерлік пен филантроптық қызметті қоғамда берік орнықтыру қажет екенін, ол үшін мемлекет тарапынан құқықтық-нормативтік негіздер жасалып, қаржылай қолдау жүйесін қолға алу қажетін атап айтты.
«Біріншіден, стратегиялық ұстанымдарды айқындайтын жаңа Жол картасын әзірлеу керек. Бұл құжат волонтерлік қызметке қуатты серпін беріп, оның алдағы жылдардағы бағытын айқындауға тиіс. Екіншіден, волонтерлік пен қайырымдылық жұмыстың есептілік жүйесін енгізу керек. Бұл бастама волонтерлік қызметті заңнама деңгейінде ынталандырудың тиімді тәсілдерін енгізуге көмектеседі», – деді Мемлекет басшысы.
Президент Тоқаевтың айтуынша, волонтерлік қызмет бұдан әрі өрістеу үшін гранттар неғұрлым ұзақ мерзімге бөлінуі керек.
«Үшіншіден, волонтерлік қызметті ұзақ мерзімді гранттар енгізу арқылы қолдауымыз керек. Бұл тұрғыда қоғам мен жеке салымшылар арасында, ұлттық және халықаралық донорлар арасында орнықты әріптестікті ілгерілету маңызды. Төртіншіден, волонтерлік және қайырымдылық істерді институционалдық тұрғыда қолдау инфрақұрылымын дәйекті түрде дамытқан жөн. Ол үшін волонтерлердің ұлттық және аймақтық деңгейдегі фронт-офисінің ұйымдастырушылық, техникалық және кадрлық әлеуетін күшейту қажет. Бесіншіден, волонтерлік қызмет саласындағы халықаралық ынтымақтастықты одан әрі нығайтуға және ілгерілетуге ерекше назар аудару қажет, – деді Қасым-Жомарт Тоқаеа.
Қазақстанда 2020 жыл Еріктілер жылы болған. Ресми есеп бойынша қазір еліміздегі волонтерлік ұйымдар саны 3 есе өсіп, 680-ге, еріктілердің саны 200 мыңға жетті. Аймақтарда фронт-офистер ашылып, оларда мыңдаған волонтер дайындықтан өтті.
