Еңбекшіқазақ ауданында Қазақстан халқы Ассамблеясы ашылып, І сессиясы жұмысын бастап кетті. Онда ҚХА-ның «Бірлік пен келісім жолындағы 30 жыл» атты ХХХIV сессиясының шешімдерін жүзеге асыру барысы пысықталды. Облыстық ішкі саясат басқармасы басшысының міндетін атқарушы Әсел Жалғасбаева сессия жұмысына төрағалық етті.
Мемлекет басшысы Қасым-Жомарт Тоқаев Қазақстан халқы Ассамблеясының ХХХIV сессиясында халық тығыз қоныстанған Алматы облысында Достық үйін, түрлі этнос өкілдері көп шоғырланған аудандарда Ассамблея ашу керектігін тапсырған болатын. Соған сәйкес облыс орталығы Қонаев қаласында арнайы жер бөлініп, келесі айда Достық үйінің құрылысы басталмақ. Ал 300 мыңға жуық халық тұратын, оның 41 пайызын этнос өкілдері құрайтын Еңбекшіқазақ ауданында жаңа құрылымда ҚХА ашылды.
Сессияда сөз алған аудан әкімі, Еңбекшіқазақ аудандық ҚХА төрағасы Талғат Байеділов:
– Ассамблея – этносаралық қатынастарды үйлестірудің және азаматтық тұтастықты нығайтудың тиімді құралы. Біздің басты міндетіміз – әр этнос өкілі өзін осы елдің тең құқықты, толыққанды азаматы ретінде сезінетін орта қалыптастыру. Бұл бағытта нақты жобалар іске асырылып жатыр, – дей келе, Мемлекет басшысының тапсырмаларын орындау мақсатында ауданда атқарылған істің барысына тоқталып, бірлік пен келісімді нығайтуға бағытталған жұмыстарды жіпке тізіп берді.
Жиын барысында облыстық аналар кеңесінің төрайымы Гүлнар Жошыбаева сөз алды. Бүгінде облыста 146 аналар кеңесі болса, оның 27-сі Еңбекшіқазақ ауданында құрылған. Кеңес мүшелері жер-жерде ұрпақтар сабақтастығын жалғастырып, отбасылық институт пен этносаралық қарым-қатынасты нығайту, тұрмыстық зорлық-зомбылықтың алдын алу мақсатында «Мәдениетті ана – мәдениетті ұлт», «Салауатты сана» сынды түрлі жобаларды жүзеге асырып келеді. Сондай-ақ аудандық ақсақалдар кеңесінің төрағасы Талғат Мұқашев та баяндама жасап, кеңес тарапынан атқарылған жұмыстарға тоқталып өтті. Ассамблея жастарының мүшесі Мурат Нажипов «Жаңа толқын» жобасы аясында жастар арасында ауданда ұйымдастырылған іс-шаралар жайын баяндады.
Мемлекет басшысы Қасым-Жомарт Тоқаев айтқандай, ҚХА мүшелері күн сайын көзге көрінбейтін, бірден нәтиже бермейтін, алайда ұзақ мерзімді, стратегиялық тұрғыдан тиімді, ауқымды жұмыс жүргізіп келеді. Елдегі тұрақтылық пен бірлік сол жұмыстың жүйелі жүруінің бір көрсеткіші іспеттес. Осы орайда сессияда Еңбекшіқазақ ауданындағы этномәдени бірлестіктердің өкілдері де атқарып жатқан жұмыстары жайлы баяндады.
Ассамблея жұмысының басты міндеті – ел бірлігі мен мемлекеттің тұтастығы, қоғам тыныштығы, халықты ортақ құндылық пен бір мүддеге жұмылдыру екендігі де сессия барысында айтылды.
Құралай Мұратқызы
Еңбекшіқазақ ауданы
