“Ұрпақ тәрбиесі – ұлт болашағы”, – деп дана халқымыз бекер айтпаған. Қай кезеңде де елдің ең басты байлығы адам капиталы, оның ішінде білімді, тәрбиелі, ар-намысы биік жастар болған. Бүгінде еліміздің түкпір-түкпірінде осындай үміт артатын жас ұрпақ өсіп келеді. Солардың қатарында болашағынан зор үміт күттіретін, білім мен ізгілікке құштар Серікбай Тайжан мен Саматов Нұрғиса сынды өскелең ұрпақ бар.
Талаптың тұлпарын мінген Тайжан
Серікбай Тайжан – Алматы облысы, Есік қаласындағы BIL лицейінде 9-сыныпта оқитын зерек жас. Жасы 15-те болса да, ойы ұшқыр, талпынысы биік. Бес баланың тұңғышы ретінде жауапкершілікті жастайынан сезініп, іні-қарындастарына үлгі болып жүр. Ол математика, информатика, ағылшын тілдерін ерекше ықыласпен меңгеріп жүрген, робототехникаға қызығып, өз қолымен робот құрастыратын болашағы зор дарын.
Бүгінде Тайжан заманауи ІТ технологиялар бағыты бойынша алғашқы стартап жобасын әзірлеу үстінде. Ол ақылды үй жүйелеріне арналған шағын құрылғы жасауды қолға алып, бұл идеясын мектепішілік көрмеде сәтті қорғап шықты. Бұл жай ғана баланың әуестігі емес, болашақта ел игілігіне жарайтын іргелі бастама.
«Білекті бірді жығар, білімді мыңды жығар» демекші, Тайжан тек ғылыммен шектеліп қоймай, волонтерлік бағытта да белсенділік танытып жүр. Бос уақытында кіші сыныптарға арналған үйірмелерге қатысып, аға ретінде ақылын айтып, кішіге қамқор бола біледі. «Бала – ұяда не көрсе, ұшқанда соны іледі» дегендей, оның бойындағы кісілік қасиеттер отбасындағы тәлім мен мектептегі тәрбиенің үйлесімді жемісі.
Арманға қанат қаққан – Нұрғиса
Саматов Нұрғиса – NIS мектебінің 8-сынып оқушысы, озат білім иесі. Математика мен ағылшын тілі оның жанына жақын пәндер. Нұрғиса – ойлы, сабырлы, талапты жас. Ол қоғамдық және мектепішілік іс-шаралардың бел ортасында жүріп, көшбасшылық қабілетін ұштап келеді.
Оқумен қатар, спорт пен өнерге де жақын: футбол клубының мүшесі ретінде тұрақты жаттығуға қатысып, салауатты өмір салтын ұстанады. Бүгінде қытай тілін қосымша үйреніп, болашақта бірнеше тілді меңгерген кәсіби маман болуды армандайды. Ал арманға апарар жол – мақсат пен еңбек екенін жақсы түсінеді.
Нұрғиса да өз стартап жобасын қолға алып, оқушыларға арналған мобильді қосымша жасауда. Бұл қосымша арқылы үй тапсырмаларын жоспарлау, уақытты тиімді бөлу, күнделікті оқуды жүйелеу мүмкін болады. Білімге деген құштарлығы мен технологияны меңгеруге деген ниеті оның тек өзіне ғана емес, өзгелерге де пайда әкелуге ұмтылатын азамат болып қалыптасып келе жатқанын дәлелдейді.
Сондай-ақ, Нұрғиса волонтерлік жобаларда да белсенді. Ардагерлерге құрмет көрсету, сенбілік жұмыстарға қатысу, қайырымдылық акцияларына атсалысу оның күнделікті өмірінің бір бөлігіне айналған. «Үлкенге – құрмет, кішіге – ізет» ұстанымын берік ұстанған жас ертең ел тізгінін сеніп тапсыратындай нағыз азамат.
Бүгінгі бала – ертеңгі дана
«Жас келсе – іске» дейді дана халқымыз. Тайжан мен Нұрғиса – заманауи ел жастарының бейнесі: білімге құштар, елге адал, жүрегі мейірімге толы. Олар тек мектеп қабырғасында ғана емес, өмір мектебінде де шыңдалып келеді.
Екі жас та болашақта шетелдің жетекші жоғары оқу орындарында білім алып, заманауи ғылым мен технологияның биігін бағындыруды армандайды. Бірақ олардың арманы тек жеке жетістікке жету емес – алған білімін туған еліне, Қазақстанның дамуына қызмет етуге бағыттау. Олар “Жердің жарығы – Күннен, елдің көркі – ұрпақтан” екенін терең түсінеді. Сондықтан да бұл жас дарындар болашақта елдің өркендеуіне үлес қосатын, биік мақсаттарға ұмтылатын, Отанға адал азамат боларына сенім мол.
Мұндай оқушылар ертеңгі ел тұтқасы, мемлекет мақтанышы. Олардың жетістігі – ұстаздың еңбегі мен ата-ананың тәрбиесінің жемісі. Осындай дарынды, ізденімпаз, еңбекқор ұрпақ өсіп келе жатқанда, еліміздің келешегі кемел, болашағы жарқын боларына шүбә жоқ.
Біз мұндай жастарға қарап шабыттанамыз, үміттенеміз. Ел ертеңі осындай арманшыл да мақсатшыл өрендердің қолында екені көңілге медеу.
