«Таза Қазақстан» жалпыұлттық экологиялық акциясы 2024 жылдың көктемінде Президент Қасым-Жомарт Тоқаевтың ұсынысымен бастау алып, бүкіл ел аумағында жалғасқан игі шараға айналды. Биыл акцияның ауқымы кеңіп қана қоймай, оның мазмұны да байытылды.
Әр өңірде тазалық жұмыстарын жалғастырумен бірге, экологиялық мәдениетті насихаттауға арналған экологиялық фестивальдер, байқаулар, білім шаралары қолға алынды. Облыс орталығының 55 жылдық мерейтойы да бұл экологиялық акциядан тыс қалмады.
Қонаев қаласында шаһардың 55 жылдық мерейтойына орай «Таза қала – таза сана» экоакциясы өтті. Шараға 200-ден астам қала тұрғыны, шамамен 100 кәсіпкерлік нысан иесі және мемлекеттік органдардың қызметкерлері қатысты. Сенбілік барысында қоғамдық орындарды тазалау және абаттандыру жұмыстары жүргізілді. Нәтижесінде 400 қаптан астам қоқыс жиналып, көшелер, саябақтар мен аулалар тазартылды. Ұйымдастырушылардың айтуынша, мұндай форматтағы акция – тұрғындармен бейресми, ашық байланыс орнатудың, қоғам назарын еңбек адамдарына аударудың тиімді тәсілі. Бұл бастама экологиялық жағдайды жақсартуға, абаттандыру мәдениетін арттыруға және туған қала игілігі жолындағы бірлескен еңбек дәстүрін дамытуға бағытталған.
Ерзат АСЫЛ
Қонаев қаласы
