Қонаев шаһарында Республика күніне орай мыңдаған тұрғын мен қала қонақтарын тамсандырған мерекелік шара өтті. Орталық алаңда эстрада жұлдыздары өнер көрсетіп, патриоттық әндер, тыңдарманның жүрегінен орын алған танымал әуендер шырқалды. Шараның ең әсерлі тұсы, қала аспанын түрлі-түсті шаммен көмкерген дрондар шоуы болды. Мұндай шоу Қонаев қаласында бірінші рет өткізіліп тұр.
Әуеге көтерілген 500 дрон түрлі бейнеге еніп, ел тарихы мен өңір ерекшелігінен сыр шетті. Қазақстан Туы, киелі домбыра, Алматы облысының нышаны саналатын қар барысы, Алтын адам мен қып-қызыл апорт бейнесі, құттықтау жазбалары көрерменнің патриоттық сезімін оятып, еліне деген сүйіспеншілігін арттырды. Әсіресе ақырын басып, алға жылжып бара жатқан қар барысының көрінісі өңірдің де даму жолын, бағындырар белесін суреттегендей. Шоу аяғында мыңдаған көрермен көк аспанда дронмен жазылған Әнұран мәтіні мен желбіреген Көк Туға қарап, Мемлекеттік Гимнды шырқады.
Қала тұрғыны Ақбота Жұмағазы: «Мұндай шоуды алғаш көруім. Әсем көріністер көздің жауын алып, көңілге ерекше қуаныш орнатты. Әсіресе Қазақстан Туы бейнеленгенде кеудемді мақтаныш сезімі кернеді», – деп өз әсерімен бөлісті.
Осылайша орталық алаңға жиналған қауым керемет кештің куәсі болып, ән-жырдың әуезіне елітіп, әуеде қалықтаған ұлттық болмыстың көрінісін тамашалап, ерекше әсерге бөленді.
Гүлзат Байқонысова
