Облыстық әкімдікте Автомобиль көлігі және автожол саласы қызметкерлерінің кәсіби мерекесіне арналған салтанатты марапаттау рәсімі өтті. Игі шарада аймақтың жол-көлік инфрақұрылымын дамытуға елеулі үлес қосқан сала мамандарының еңбегіне құрмет көрсетілді.
Облыстық мәслихат төрағасы Қуат Байғожаев сала қызметкерлерін мерекемен құттықтап, ел экономикасы мен өңірдің өркендеуіне қосқан қомақты үлестерін атап өтті.
«Сіздердің қажырлы еңбектеріңіздің арқасында елімізде жолаушылар мен жүк тасымалы үздіксіз жұмыс істеп, автожол инфрақұрылымы жылдан- жылға жаңарып келеді. 2025 жылы облыстық маңызы бар автомобиль жолдарын жөндеуге бағытталған бірқатар жоба жүзеге асырылуда. Жалпы алғанда, биыл жоспарланған 185,3 км жолдың қазір 152 шақырымы, яғни 82%-ы күрделі жөндеуден өтті. Олардың арасында «Нарынқол – Сүмбе», «Қарқара – Ереуіл» сынды шалғайдағы өңірлерді қамтыған ауданаралық жолдар бар. Сонымен қатар Мемлекет басшысының тапсырмасына сәйкес, биыл Алматы облысында теміржол вокзалдарын жаңғырту жұмысы қолға алынды. Аймақта жол құрылымын жаңартуға бағытталған игі жобалар жүзеге асуда»,– деді мәслихат төрағасы.
Еңбегімен еленген сала қызметкерлері «Құрметті жолшы» төсбелгісі, ҚР Көлік министрлігінің, облыс әкімінің Құрмет грамотасы және Алғыс хатымен марапатталды.
Ерзат АСЫЛ
