Жамбыл ауданының әкімдігі жанындағы аудандық мобильді топ штабының кезектен тыс отырысы өтті. Онда «Бақытты және қауіпсіз балалық шақ» жобасы аясындағы шаралар әңгіме өзегіне айналды.
Кеңестің жұмысына Жамбыл аудандық прокуратурасы, білім бөлімі, ауылдық округ әкімдері мен мамандары, жұмыспен қамту және әлеуметтік бағдарламалар бөлімі, аудандық аурухана, Отбасын қолдау орталығы және өзге де мүдделі мекемелердің өкілдері қатысты. Күн тәртібінде «Бақытты және қауіпсіз балалық шақ» жобасы аясында аудан бойынша атқарылып жатқан жұмыстар мен мобильді топтардың нәтижелері қаралды. Жиынды аудан әкімдігі жанындағы мобильді топтың төрағасы, аудан әкімінің орынбасары Әділбек Қамбарұлы жүргізді. Ол жобаның мақсаты мен оны жүзеге асыру барысы жөнінде баяндама жасады. Жауапты мамандарға рейдтік аралау шараларының нәтижесі бойынша ақпараттарды уақытылы жинақтап, тиісті органдарға дер кезінде жеткізуді тапсырды.
Штаб отырысында аудан прокуратурасының өкілі қызыл шекті аймақтардағы отбасылармен жұмыс жүргізу және тексеру парағын толтыру тәртібі туралы түсіндірді. Отбасын қолдау орталығының директоры Панар Бөлдешова осы жылдың 10 қазанынан бастап аудан көлемінде жүргізілген аула аралаудың нәтижелерін баяндады. Жиында аудан бойынша 340 отбасында тұратын 662 бала «қызыл аймақ» тізіміне енгізілгені айтылды. «FSM Social» платформасында 172 хабарлама тіркелді, оның ішінде прокуратурадан – 74, білім бөлімінен 98 ақпар түскен. Тексеру барысында 167 отбасының тұрмыстық жағдайы қанағаттанарлық, ал 5 отбасы әлеуметтік қолдауды қажет ететіні анықталды.
Штаб төрағасы барлық мекемеге бірлесе жұмыс істеуді, отбасылардың жағдайын тұрақты бақылауда ұстауды және алдын алу шараларын күшейтуді тапсырды. Аралау нәтижелері әр аптаның сәрсенбі күніне дейін Отбасын қолдау орталығына жолданып, аудан әкімдігі мен прокуратураға жеткізіліп отырады. «Бақытты және қауіпсіз балалық шақ» жобасының мақсаты – балалардың қауіпсіз әрі бақытты өмір сүруіне жағдай жасау, тұрмыстық қиындықтарға тап болған отбасыларға қолдау көрсету және кәмелетке толмағандарға қатысты құқықбұзушылықтардың алдын алу.
Жуырда, сондай-ақ, аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссияның да кезектен тыс отырысы өтті. Күн тәртібінде Қарғалы ауылының №3 орта мектебінде болған жайсыз жағдай талқыланды. Әлеуметтік желіні шулатқан мәселеге байланысты мектеп әкімшілігі мен ата-аналар шақырылып, түсіндіру және алдын алу бағытындағы жұмыс жүргізілді. Отырысқа аудан әкімінің орынбасары, аталған комиссияның төрағасы Әділбек Қамбарұлы төрағалық етті. Шараға аудандық білім бөлімінің басшысы Светлана Алтынбекова, Қарғалы ауылындағы мектептердің директорлары мен тәрбие ісі жөніндегі орынбасарлары, аудандық ішкі істер бөлімінің өкілдері және өзге де комиссия мүшелері қатысты. Кездесу барысында оқушылардың құқықтарын қорғау, тәрбие жұмысын күшейту және мектеп пен ата-аналар арасындағы өзара байланысты арттыру мәселелері талқыланды. Комиссия мүшелері кәмелетке толмағандар арасындағы құқықбұзушылықтардың алдын алу бағытында бірлесіп жұмыс істеудің маңыздылығын атап өтті.
Мұның алдында медицина қызметкерлері Қарғалы ауылының №3 орта мектебінде қыздарға арналған жиналыс өткізген болатын. Онда Қарғалы ауылындағы аудандық аурухананың жастарға арналған денсаулық кабинетінің дәрігерлері, акушер-гинеколог, жасөспірімдер дәрігері, психологтар қыздарға «Ерте жастағы жүктіліктің және зиянды әдеттердің алдын алу» тақырыбында кеңес берді. Бұл ретте Қарғалы ауылының аудандық ауруханасында мектеп ұжымымен бірлесіп атқарылатын жылдық жоспар да бекітілген.
Серік САТЫБАЛДИЕВ
Жамбыл ауданы
