Облысқа жұмыс сапарымен келген ҚР Еңбек және халықты әлеуметтік қорғау министрі Светлана Жақыпова алдымен өңір активімен жүздесті. Басқосуда министр Мемлекет басшысының тапсырмаларының орындалуы, қазақстандықтарды әлеуметтік қолдау шаралары туралы баяндады.
Астаналық мейман жиында әлеуметтік қорғау, жұмыспен қамту, еңбек қауіпсіздігі мен еңбекті қорғау тиімділігін арттыруға бағытталған цифрлық шешімдерді және министрлік енгізген негізгі цифрлық құралдарды таныстырды. Олардың қатарында отбасының және кәсіпорындардың цифрлық картасы, инновациялық жобалар навигаторы және мемлекеттік қолдау шараларының ашықтығын және нәтижелілігін арттыруға мүмкіндік беретін басқа да шешімдер бар. Министр Алматы облысы бойынша әлеуметтік міндеттемелердің толық орындалып отырғанын, бүгінде білім, денсаулық, спорт саласындағы мекемелер бірыңғай цифрлық платформада жұмыс істеп жатқанын тілге тиек етті. Жасанды интеллектінің көмегімен атаулы әлеуметтік көмекті заңсыз алып отырғандар анықталып, артық қаражат бюджетке қайтарылғанын жеткізді.
Актив отырысын қорытындылаған облыс әкімінің бірінші орынбасары Қанат Есболатов еңбек нарығын дамыту бойынша өзекті мәселелер жөнінде пікір алмасқан Светлана Қабыкенқызына алғыс білдірді. Одан кейін ҚР Еңбек және халықты әлеуметтік қорғау министрі Қонаев қалалық Мәдениет үйінде облыс тұрғындарымен кездесу өткізді. Жиынға аталған министрліктің Халықты әлеуметтік қорғау саласындағы реттеу және бақылау комитетінің төрағасы Илья Скуб, облыс әкімінің бірінші орынбасары Қанат Есболатов, облыстық басқарма мен аудандық жұмыспен қамту мен әлеуметтік бағдарламалар бөлімдерінің басшылары, медициналық-әлеуметтік ұйымдардың өкілдері, үкіметтік емес ұйымдар, көпбалалы аналар, мүгедектігі бар жандар және өңірдің өзге де белсенді тұрғындары қатысты.
Кездесуде Светлана Жақыпова министрлік тарапынан халықтың түрлі санаттарын қолдауға бағытталған шаралар туралы мәлімдеді.
– Ел Президентінің тапсырмасы бойынша 2023 жылдан бастап базалық зейнетақыны кезең-кезеңімен арттыру жүзеге асырылып келеді. Биыл оның ең төменгі мөлшері күнкөріс минимумының 70 пайызына, ең жоғары мөлшері 110 пайызына дейін ұлғайтылды. Сондай-ақ 2023 жылы ынтымақты зейнетақыны есептеу үшін қабылданатын ең жоғары табыс мөлшері 46-дан 55 айлық есептік көрсеткішке дейін көтерілді. Мемлекеттің барлық әлеуметтік міндеттемелері толық көлемде орындалып келеді. Зейнетақылар мен жәрдемақылар уақытылы төленуде. 1 қарашадағы жағдай бойынша республикада 5,4 млн адамға жалпы сомасы 5,7 трлн теңгеге зейнетақы мен жәрдемақы төленді. Алматы облысында 400 мыңнан астам адамға 340,5 млрд теңге көлемінде берілді. Басты мақсатымыз – халықтың әл-ауқатын арттыру, – деді Светлана Қабыкенқызы.
Министрдің айтуынша, Мемлекет басшысының тапсырмасына сәйкес нағыз көмекке мұқтаж отбасыларды қолдау үшін әлеуметтік көмек беру тетіктері күшейтілген. Барлық тағайындау процесінің ашықтығын қамтамасыз ету мақсатында бірыңғай ақпараттық жүйе қолданылады. Сондай-ақ учаскелік комиссиялардың жұмысы цифрландырылған.
Светлана Жақыпова мүгедектігі бар жандарды әлеуметтік қолдау мәселелеріне ерекше назар аударды. Бүгінде Қазақстанда 743 мыңнан астам адам мүгедектігі бар деп танылған. Алматы облысында 44 мыңдай тұрғынға мүгедектік белгіленген. Олардың шамамен 57 пайызы еңбекке қабілетті жаста болса, 27 пайызы зейнеткер, 15 пайызы – 18 жасқа дейінгі балалар.
Елімізде 2030 жылға дейінгі инклюзивтік саясат тұжырымдамасы іске асырылуда. Әлеуметтік қызметтер порталы базасында мүгедектігі бар адамдарға жеке қажеттіліктерін ескере отырып, оңалтудың техникалық құралдарын өздігінен таңдау мүмкіндігі берілген. Портал жеткізушілер арасындағы бәсекелестікті дамытуға ықпал етіп, қызметтердің сапасы мен қолжетімділігін арттырады. Көру қабілеті төмен пайдаланушыларға арналған арнайы нұсқа әзірленіп, медициналық-әлеуметтік сараптама бөлімдеріне онлайн жазылу және санаторийлердің қолжетімділігі туралы ақпаратты қарау мүмкіндігі қамтамасыз етілген. Алматы облысында портал арқылы техникалық құралдармен және оңалту қызметтерімен қамтамасыз ету бойынша 23,2 мың іс-шара орындалған.
Мүгедектікті белгілеу процесінің тиімділігін арттыру үшін енгізілген сырттай проактивті формат өтініш берушінің уақытын үнемдеп, қағазбастылықтан арылтады. Былтыр арнайы әлеуметтік қызметтер жүйесін трансформациялау жұмысы басталған. Орталықтардың қызметін цифрландыру процестердің ашықтығын қамтамасыз етуде. Биыл 1 қаңтардан бастап Алматы облысындағы барлық орталыққа лицензия берілген. Сонымен қатар әрбір қызмет алушының дербес қажеттіліктеріне бағытталған жан басына шаққандағы қаржыландыру жүйесі енгізілуде.
Өз сөзінде министр еңбек қауіпсіздігін қамтамасыз етудің маңыздылығын атап өтіп, Еңбек тәуекелдері картасының тиімділігіне тоқталды.
– Проактивті профилактикаға көшу 3 мыңнан астам кәсіпорынды жоғары тәуекел аймағынан шығаруға мүмкіндік берді. Еңбек жағдайларының ашықтығын қамтамасыз ету мақсатында электрондық ұжымдық шарттар жүйесі енгізілді. 15 мыңға жуық шарт цифрландырылды. Сондай-ақ 3,9 млн-нан астам еңбек шарты цифрланды. Бұл – жұмысшылардың 90,2 пайызы, – деді Светлана Жақыпова.
Былтырдан бастап Мемлекет басшысының тапсырмасы бойынша зиянды және қауіпті еңбек жағдайларында жұмыс істейтін қызметкерлерге арнайы әлеуметтік төлемдер енгізілген. Алматы облысында өткен жылдың қорытындысы бойынша 239, биыл 1 қарашаға дейін 158 төлем төленген.
Кездесу соңында Қонаев қалалық Семей ядролық полигонынан зардап шеккендер қоғамдық бірлестігі төрағасының орынбасары Назым Сабазқызы мен Ұйғыр этномәдени бірлестігінің мүшесі Халипа Рахметова Белсенді ұзақ өмір сүру орталықтарының жұмысына ризашылықтарын білдірді.
Министр тұрғындар тарапынан қойылған сұрақтарға толымды жауап беріп, кейбір мәселе бойынша тиісті орындарға тапсырма жүктеді.
Айжарық КӨПТІЛЕУОВ
