Облыс әкімі Марат Сұлтанғазиев бастаған жауапты саланың жетекші мамандары Түркияның «Nata Holding» компаниясы өкілдерімен кездесіп, өзара ынтымақтастық туралы меморандумға қол қойды. Жиын барысында облыстағы құрылыс пен инфрақұрылымды дамыту, оның ішінде жол, көпір және инженерлік жүйелерді жаңғырту, индустриялық аймақтар мен логистикалық нысандарды салу мәселесі талқыланды. Сонымен қатар тұрғын үй, сауда және бизнес бағытындағы жобаларды іске асыру, туризм саласында жаңа демалыс аймақтары мен қонақүйлер тұрғызу, жергілікті құрылыс материалдары өндірісін дамыту мүмкіндіктері қаралды.
Марат Елеусізұлы өткен айда компанияның Қазақстандағы өкілдерімен кездескенін айтып, бұл жиынға холдингтің жоғары басшылығының келуі аймаққа деген үлкен құрметтің белгісі екенін жеткізді. «Бүгінде Алматы облысы – елдегі ең қарқынды дамып келе жатқан өңірлердің бірі. Инфрақұрылымды дамыту, инвестиция тарту және жаңа өндіріс аймақтарын құру бойынша ауқымды жұмыс жүргізілуде. Облыста 1 млн 600 мыңға жуық адам тұрады. Өңірдің тыныс-тіршілігі ауыл шаруашылығымен байланысты. Оның әр бағыты бойынша республикада алғашқы үштікте тұрмыз. Өндіріс саласы да жақсы дамып келеді. Көптеген құрылыс материалдары Алматы облысында шығарылады. Соңғы екі жылда көрсеткіш төрт есеге көбейді. Әсіресе Өзбекстан мен Қырғызстанға көп экспортталуда. Жалпы ішкі өнім соңғы үш жылда 3,4 трлн-нан 6 трлн теңгеге артты. Шекарамыз Қытай, Қырғызстан елдерімен шектеседі. Қазақстандағы ең ірі мегаполис Алматы қаласы да біздің облыспен шектеседі. Сондықтан да инвесторлар үшін өңірде түрлі жобаларды іске асыру өте ыңғайлы әрі жаңа мүмкіндіктерге жол ашады», – деген аймақ басшысы өзекті мәселелерге де тоқталып өтті. Айтуынша, Қонаев қаласының облыс орталығы атанғанына үш жылдан астам уақыт қана болғандықтан, инфрақұрылым бойынша шешімін таппаған біраз мәселе бар. Су, электр желілерінің тозуы 50 пайыздан асқан. Жоспарда жаңа нысандарды салу ғана емес, ескі жүйелерді жаңарту да қарастырылған. Алматының төңірегінде бұрын 5-6 мың ғана халық тұрса, қазір ол 10-20 есеге көбейіп, ал инженерлік желілер бұрынғы деңгейде қалған. Электр қуатының жетіспеушілігі де байқалады. Сондай-ақ облыс орталығында әлеуметтік-мәдени нысандар жетіспейді. Саяжай мәселесі де өзекті болып тұр. Бұрын ол халықтың демалып қайтатын орны болса, қазір адамдардың тұрақты мекенжайына айналған. Облыстағы 677 саяжайда 200 мыңға жуық халық тұрады. Ондағы жол, инженерлік желілер қалпына келтіруді қажет етеді. Қазір бұл саяжайлар ауыл шекарасына қосылуда. Сол кезде ғана инфрақұрылым жайы шешілетін болады. «Nata Holding» компаниясының бұл саладағы тәжірибесі аталған мәселелерді шешуге мүмкіндік береді. Әкімдік жер телімін таңдаудан бастап, рұқсат құжаттарын рәсімдеуге дейін толық қолдау көрсетуге дайын», – деді облыс әкімі. Ал «Nata Holding» компаниясының басқарма төрағасы Таник Намык мұндай бастамалар Қазақстан мен Түркия үшін маңызды қадам екенін, компания өңірдің дамуына үлес қосуға бар күшін салатынын атап өтті.
Кездесу барысында облыста іске асып жатқан ауқымды жобалар таныстырылды. Соның бірі – жаңадан бой көтергелі жатқан Алатау қаласы. Оның Бас жоспары Сингапур компаниясымен бірлесіп жасалған. Қазіргі таңда арнайы экономикалық аймақ мәртебесі бойынша заң әзірленуде. Заң күшіне енсе, инвесторларға жеңілдіктер қарастырылмақ. Жоспар бойынша қала «Gate», «Golden», «Growing» және «Green Districts» тақырыптық бағыттары бойынша төрт ауданға бөлінеді. Тағы бір үлкен жоба облыс орталығы Қонаев қаласын дамытуға бағытталған. Шаһардың Бас жоспары екі жыл бұрын бекітілген. Бірақ қаланың кей бөлігі Алатау қаласына қосылып, жаңа инвесторлармен келіссөздер жүргізілгендіктен жоспар қайта жасалған. Ескі қалада инновациялық жобалар іске асырылып, инженерлік желілер жаңартылып, әкімшілік ғимараттар салынбақ. Ал «Жаңа Іле» шағынауданында заман талабына сай, креативті нысандар – спорт орталығы, мешіт, кітапхана, театр, галерея, оқу орындары бой көтереді. Бүгінгі таңда инженерлік желілерді жаңарту жоспары мемлекеттік сараптамаға жіберілген. Соның қорытындысы шыққаннан кейін құрылыс жұмысы басталатын болады. 2050 жылға дейін мұнда 200000-нан астам адам тұрады деген болжам бар.
Жиыннан кейін компания өкілдері Қонаев қаласындағы «Жаңа Іле» алабына барды. Онда Қонаев қаласының әкімі Асхат Бердіханов шаһардағы Шеңгелді алабындағы сорғы стансаларының суару желілерін қайта жаңарту мәселесі бойынша баяндама жасады. Сондай-ақ «ASP Arena» ойын-сауық кешені, «Байсерке Агро», «Oi-Qaragai Lesnaya Skazka», «Дәулет-Бекет» және «А.Асанов атындағы ату клубы» ЖШС-на барып, жұмыс барысымен танысты.
Кездесу соңында екі тарап бірлесе жұмыс жүргізуге ниетті екендерін білдіріп, іс нәтижелі болу үшін қажетті шараларды айқындады.
Гүлзат БАЙҚОНЫСОВА
