Бүгінгі қоғамның ең өзекті мәселелерінің бірі – жемқорлыққа қарсы күрес. Сыбайлас жемқорлық – мемлекеттің дамуын тежейтін, халықтың билікке деген сенімін әлсірететін қауіпті індет. Сондықтан адалдық қағидаттарын қалыптастыру, әр азаматтың жауапкершілігін арттыру – баршамыздың ортақ міндетіміз.
Алатау қаласы бұл бағытта нақты ұстаным қалыптастырған өңірлердің қатарында. Қаламызда «Жемқорлыққа жол жоқ» қағидаты тек ұран ретінде емес, күнделікті жұмыстың нақты негізі ретінде іске асырылып келеді. Мемлекеттік қызмет көрсетуде ашықтықты қамтамасыз ету, цифрлық форматқа көшу, қоғамдық бақылауды күшейту – сыбайлас жемқорлық тәуекелдерін азайтудың басты тетіктері саналады.
Қоғамдық пікір көшбасшылары ретінде біз халық пен билік арасындағы сенімді нығайтуға ерекше жауаптымыз. Әрбір азамат өз құқығын білуі, кез келген заңсыз әрекетке төзбеушілік танытуы тиіс. Тек осылай ғана біз адал қоғам қалыптастыра аламыз. Өйткені жемқорлыққа қарсы күрес – тек мемлекеттік органдардың емес, тұтас қоғамның ісі.
Алатауда мемлекеттік қызметшілердің этикасы мен жауапкершілігін арттыру бағытында жүйелі жұмыстар жүргізіліп келеді. Арнайы кездесулер, түсіндіру іс-шаралары, ашық диалог алаңдары ұйымдастырылып, тұрғындардың өтініш-шағымдарын тікелей тыңдау тәжірибесі жолға қойылған. Әрбір көтерілген мәселе ашық қаралып, оның заң шеңберінде шешілуіне баса мән беріледі.
Жемқорлықсыз қоғам – әділетті қоғам. Әділет бар жерде даму бар, тұрақтылық бар, халықтың болашаққа деген сенімі нығаяды. Сондықтан әр тұрғын өзінің азаматтық ұстанымын айқын білдіріп, адал еңбек ету арқылы еліміздің ертеңіне үлес қосуы қажет.
Алатау қаласы үшін тазалық пен әділдік – басты құндылықтар. Біз жемқорлыққа қарсы күресте бірлік танытып, заң үстемдігін берік сақтаған жағдайда ғана өркениетті, өрелі қоғам құра аламыз.
Алатаудан басталған адалдық – бүкіл елге үлгі болуы тиіс!
Риза Саурбаева,
Алатау қаласының қоғамдық кеңесінің төрайымы
