«Зорлық-зомбылықсыз 16 күн» халықаралық акциясы Райымбек ауданында да қолға алынды. Әйелдер мен балаларға қатысты зорлық-зомбылықтың алдын алу, жәбірленушілерге қолдау көрсету – әрқайсымыздың ортақ міндетіміз.
Аудандағы мекемелер мен ұйымдар акцияға белсене қатысып, ауылдық округтерде түсіндіру жұмыстары, ашық әңгімелер, дөңгелек үстелдер ұйымдастырылды. Райымбек аудандық полиция басқармасының өкілдері де тұрғындар арасында арнайы рейд пен профилактикалық шаралар жүргізіп, азаматтарға кеңес беруде. Білім беру ұйымдары да акциядан тыс қалмады. Мектептер мен колледждерде оқушыларға арналған тренингтер, сенімді қарым-қатынас орнату, жанжалды шешудің бейбіт жолын үйрететін семинарлар өтіп жатыр. Жасөспірімдерге арналған психолог кеңестері, ата-аналар жиналысы, құқықтық мәдениет сабақтары да жоспарға енгізілген. Тәжірибемде көптеген жәбірленушілердің көмек сұрауға батылы жетпей, үнсіз қалатынын жиі байқаймын. Сондықтан акция барысында біз тұрғындарға зорлық көрген адамдарды айыптамау, қайта оларға қолдау көрсету қажеттігін түсіндіруді басты назарға алып отырмыз.
Зорлық-зомбылықтың физикалық, психологиялық, экономикалық, жыныстық және цифрлық түрлері бар. Оның әрқайсысы адамның өміріне, денсаулығына және қоғам тұрақтылығына елеулі қауіп төндіретінін атап өткім келеді. Жәбірленушілерді қолдау – қоғамның ортақ міндеті!
Қорытындылай келе, «Зорлық-зомбылықсыз 16 күн» акциясы Райымбек ауданының тұрғындарын да бейжай қалдырмай, оларды бірлесіп әрекет етуге шақыратын маңызды бастама болып отыр. Егер біз бір-бірімізге қолдау көрсете білсек, қауіпсіз қоғам қалыптастыруға өз үлесімізді қоса аламыз.
Динара Ілияс,
Райымбек аудандық отбасын қолдау орталығының психологы
