Кеген аудандық әкімдігінде өңір халқының санитариялық-эпидемиологиялық қауіпсіздігін қамтамасыз ету және жұқпалы аурулардың алдын алу мәселелері бойынша үйлестіру кеңесінің кезекті отырысы өтті.
Жиынды ашқан Кеген ауданы әкімінің орынбасары Кеңес Қабылбеков:
– Кеңес отырысының негізгі мақсаты – 2025 жылдың 10 айында атқарылған санитариялық-профилактикалық шаралардың қорытындысын талқылап, туберкулез, бруцеллез, Сібір жарасы секілді жұқпалы аурулардың таралуының алдын алу бағытында қабылданып жатқан шараларды бағамдау, болашақта жүзеге асырылатын жұмыстардың нақты жоспарын айқындау, – деді.
Кеңесте қаралған алғашқы мәселе – туберкулездің алдын алу және аудандағы эпидемиологиялық жағдайға қатысты аудандық санитариялық-эпидемиологиялық бақылау басқармасының бас маманы Нұргүл Сыдықбекова баяндама жасап, жыл басынан аталған аурудың алдын алу бағытында атқарылып жатқан шараларға тоқталды. Ол вакцинадан бас тарту жағдайлары мен түсіндіру жұмысының барысы туралы да айта кетті.
Ал аудандық санитариялық-эпидемиологиялық бақылау басқармасы басшысының міндетін атқарушы Әйгерім Тәшкенбаева туберкулез дерті бойынша эпидемиологиялық ахуалға шолу жасап, аурудың алдын алуға бағытталған шараларды баяндады. Сонымен қатар жетекші маман Шырын Асылғазықызы бруцеллез және Сібір жарасы аурулары бойынша деректер мен тіркелген жағдайларға тоқталды.
Үшінші мәселе – аудандағы Сібір жарасы (антракс) ауруының эпидемиологиялық ахуалы. Бұл туралы аудандық ветеринариялық станса директоры Қабыл Төкенов баяндап, өткен жылдармен салыстыра отырып, көрсеткіштерге талдау жасады.
Жиын барысында аталған ауруға байланысты қауіпті аймақтар мен ауылдық округтерде түсіндіру жұмысын арттыру қажеттілігі айтылды. Сондай-ақ мал қорымдарының жай-күйі, биологиялық қауіпсіздік талаптарының сақталуы назарға алынды. Аудандық ветеринариялық қызмет басшысы Қабыл Төкенов аудан аумағында орналасқан Бөлексаз, Ұзынбұлақ, Тұйық, Жылысай ауылдарындағы төрт Сібір жарасы көміндісін облыс меншігіне өткізу және ІІ санаттағы экологиялық рұқсаты жоқ төрт мал қорымына рұқсат қағаздарын алу мәселесін көтерді. Ауылдық округтерде жануарларға арналған жоспарлы екпелердің орындалу барысы да сөз болды.
Қорытынды сөз алған кеңес төрағасы Кеңес Қабылбеков барлық айтылған мәселе бойынша тиісті сала басшыларына нақты тапсырмалар жүктеп, тұрғындардың денсаулығы мен қауіпсіздігін қамтамасыз ету бағытындағы жұмыстарды күшейту қажеттігін баса айтты. Кеңес отырысының шешімдері хаттамаға енгізіліп, алдағы уақытта оның орындалуы қатаң бақылауда болатыны атап өтілді.
Халықтың денсаулығын сақтау – басты міндет. Сондықтан мұндай үйлестіру кеңестері алдағы уақытта да тұрақты түрде өткізіліп, денсаулық сақтау саласындағы өзекті мәселелер күн тәртібінен түспек емес.
Дәурен ӘБУТӘЛІПОВ
Кеген ауданы
