Мемлекет басшысы мұғалімдер мен оқушылардың жасанды интеллект саласындағы білім деңгейін арттыру қажеттігін, ол салалық министрліктің болашағы үшін маңызды міндет саналатынын айтқан. Бұл міндетті Талғар ауданы Жаңалық ауылындағы «Келешек мектептері» мемлекеттік бағдарламасы бойынша салынған №27 орта мектеп ұжымы табысты атқарып келеді. Білім шаңырағындағы оқу үдерісінде толығымен дерлік инновациялық тәсіл қолданылады.
Осы заманауи озық мектеп қабырғасында облыстық білім басқармасы, Ұлттық құндылықтар академиясы, «Білім керуені» корпоративтік қоры, «Orle-EDUCATION» республикалық оқу-әдістемелік орталығы және «Өрлеу» әдістемелік орталығының қолдауымен «Ғылым. Инновациялар. Болашақ – STEAM & AL» атты халықаралық форум өтті. Іс-шара Жұмысшы мамандықтары жылына орай ұйымдастырылып, жасанды интеллект бағытында білім беру тәжірибесін дамытуға, инновациялық идеялар мен жобаларды енгізу арқылы педагогтердің әдістемелік шеберлігін жетілдіруге бағытталды. Білім ордасының фойесінде мектеп әкімшілігі ғылыми жоба көрмесін ұйымдастырды. Қонақтарды ұлттық күйлерді бірінен кейін бірін орындаған домбырашы балалар ансамблі қарсы алды.
Форумды облыстық білім басқармасының басшысы Арайлым Төлеубекова ашып, жиын қатысушыларына жылы лебізін білдірді.
– Ғылым, инновация, болашақ – біздің басты құндылықтарымыз. Бүгінгі форум үздік оқытушылардың озық инновациялық тәжірибесін тарату, кәсіби ынтымақтастықты дамыту арқылы әріптестерді шығармашылық және өзара кәсіби қолдау мәдениетін қалыптастыру мақсатында өткізіліп отыр. Баршаңызға осы бағытта толайым табыс тілеймін, – деді аймақтың бас мұғалімі.
Форумға бауырлас көрші елдер – Қырғыз Республикасы мен Өзбекстаннан қонақтар келгенін айта кеткен жөн. Халықаралық жиын STEAM – білім беру және инновациялық әдістер, білім берудегі цифрлық трансформация, ЖИ құралдарының әлеуеті, жобалау қызметі және функционалдық сауаттылықты арттыру тетіктері, оқу процесінде «Адал азамат» құндылықтарын іске асыру деп аталатын төрт секциялық алаңда өтті. Сондай-ақ қатысушылар «Археология», «Эко-АРТ-шеберхана», «Мамандандыру аймағы», «Белсенді ойындар», «Аэроғарыш және авиация», «STEAM-шоу аймағы», «Таңғажайып эксперименттер», «Эко-дос» жобасы, «Сиқырлы физика», «Medilab», «Телестудия әлемі», «Dragon Air Race» айдаһарлар жарысы, «Робототехника» сияқты 12 тақырып бойынша тәжірибе алаңында сайысқа түсті.
Аталған сайыста әрбір педагог өзін қызықтыратын тақырыпты таңдады. Ең соңында авторлардың практикалық жобалық жұмыстары зерделенді. Жоба жетекшілерінің айтуынша, практикалық алаңдар балалардың ой-өрісін кеңейтіп қана қоймай, болашақ мамандықты таңдауға көмектеседі, ал педагогтерге білім беру жүйесіндегі ЖИ және сандық технологиялар саласында тәжірибе алмасуға мол мүмкіндік береді.
Құтмағамбет ҚОНЫСБАЙ
Талғар ауданы
