Қонаев қаласында шілденің 21-22 күндері І Халықаралық медиа форум өтеді. Айтулы шараны Түркітілдес журналистер қоры мен Алматы облысының әкімдігі, Ақпарат және қоғамдық даму министрлігі, Мәдениет және спорт министрлігі бірлесіп ұйымдастырады. Форумға Түркия, Ұлыбритания, Австрия, Бельгия, Германия, Франция, Молдова, Өзбекстан, Әзербайжан, Қырғызстан сияқты 15 елден 200-ден астам адам, оның ішінде шетелдік және қазақстандық БАҚ басшылары, үкіметтік емес ұйым жетекшілері, журналистер, баспасөз хатшылары, PR-менеджерлер, туризм саласының мамандары қатысады қатысады.
Форум медиа және туризм саласындағы тәжірибе алмасуға ықпал ету және ақпарат кеңістігін дамыту, еліміздегі көрікті жерлер мен тарихи-мәдени орындарды шетелдік және отандық баспасөз өкілдеріне таныстыру, түркітілдес журналистер арасында ынтымақтастық пен әріптестік байланысты арттыру мақсатында өткізілейін деп отыр. Сонымен қатар, халықаралық басқосу медиа және туризм саласында келешегі бар жобаларды құра отырып, оларды ілгерілетуге жол ашу, халықаралық ақпарат кеңістігінде туристік жобаларды танымал ету, жаңа медиа технологияларымен танысу, біліктілікті арттыру, іскерлік ойындар мен шеберлік сабақтары, түрлі ой-талқылар арқылы таным көкжиегін кеңейтуді көздейді.
Түркітілдес журналистер қорының жетекшісі Нәзия Жоямергенқызының жазуынша, 21 шілдеде Көлсай, Қайыңды, Есік сияқты көрікті жерлерге пресс тур болады. 22 шілдеде медиа форум, кешке салтанатты жиын ұйымдастырылады. 23 шілде күні шетелдік медиа тренерлермен семинар-тренинг өткізіледі.
