Қонаев қаласындағы «Asan-Ali Hotel» қонақүйінде ерекше қамқорлықты қажет ететін балаларға арналған жаңажылдық мереке өтті. Әр балаға үміт пен шаттық сыйлаған шараға «AMANAT» партиясы облыстық филиалының жанындағы әйелдер қанаты мұрындық болды. Ғажайыпқа сендіретін жаңажылдық кешке ерекше күтімді қажет ететін және әлеуметтік осал топ санатындағы отбасыларда тәрбиеленіп жатқан 150 бала қатысып, әрқайсысы мереке шуағын сезінуге мүмкіндік алды.
Партияның «Кедергісіз келешек» және «Бақытты отбасы» жобалары аясында өткен кешке келген балалар ертегі әлеміне енгендей әсер алды. Мерекелік зал әсем безендіріліп, жаңажылдық шырша, түрлі кейіпкерлер мен жарқыраған шамдар балалардың көңілін бірден баурады. Ұйымдастырушылар бүлдіршіндер үшін мазмұны бай әрі қызықты концерттік бағдарлама әзірлеген. Кеш барысында Аяз ата мен Ақшақар, түрлі мультфильм кейіпкерлері балалармен бірге ойын ойнап, ән салып, би биледі. Анимациялық шоу мен интерактивті қойылымдар да жеткіншектердің белсенділігін оятып, олардың сахнада еркін ойнап, өздерін алаңсыз сезінуіне мүмкіндік ашты. Әсіресе, балалардың ертегі кейіпкерлерімен бірге сахналық көріністерге қатысып, өздерін сол оқиғаның бір бөлшегіндей сезінген сәттері көптің көңілін толқытты. Бұл – тек көңіл көтеру ғана емес, ерекше балалардың қоғаммен етене араласып, өздерін маңызды әрі бағалы сезінуіне мүмкіндік берген тағылымды кеш болды.
Шара барысында сөз сөйлеген партия өкілдері мұндай бастамалардың маңыздылығына ерекше тоқталды. Олардың айтуынша, «AMANAT» партиясы үшін әлеуметтік осал топтағы отбасыларды қолдау – басты бағыттың бірі. Ерекше күтімді қажет ететін балаларды қоғамнан тыс қалдырмай, оларға әрдайым қамқорлықты сезіндіру де жалпыға ортақ міндет екенін жеткізді.
Мерекелік кеште балаларға жаңажылдық сыйлықтар табысталды. Кеш соңында әр жеткіншекке тәттілер салынған арнайы сыйлықтар беріліп, олар Аяз атамен бірге естелік суретке түсті. Балалардың қуаныштан жайнаған жүздері бұл бастаманың қаншалықты қажет екенін тағы бір мәрте дәлелдеді. Ата-аналар да ұйымдастырушыларға алғыстарын білдіріп, мұндай шаралардың ерекше қамқорлықты қажет ететін балалар үшін маңызы зор екенін атап өтті. Олардың айтуынша, мұндай мерекелер баланың эмоционалдық дамуына ғана емес, қоғамға бейімделуіне де оң әсер етеді.
Айта кетерлігі, биыл өңіріміз бойынша «AMANAT» партиясының мүшелері 2 мыңнан астам балаға жаңажылдық сыйлық табыстап, бірнеше ауданда осындай мерекелік бағдарламаларды жүзеге асыруда. Әр ауданда ұйымдастырылған кештердің басты мақсаты – балаларға қуаныш сыйлау, отбасыларға моральдық қолдау көрсету және қоғамда мейірімділік құндылықтарын нығайту. Қонаевтағы бұл жаңажылдық кеш партияның әлеуметтік жауапкершілікті терең сезінетінін және нақты іспен қолдау көрсетіп келе жатқанын айқын аңғартты. Жаңа жыл қарсаңында жасалған әрбір жақсылық, жылы сөз бен шынайы қамқорлық жеткіншектердің болашаққа деген сенімін нығайта түсетіні сөзсіз.
Құралбек СӘБИТОВ
