Мемлекет басшысы Қасым-Жомарт Тоқаев «Түркістан» газетіне берген сұхбатында елдің әлеуметтік-экономикалық дамуына қатысты басым бағыттарға тоқталып, алдағы кезеңге арналған негізгі міндеттер мен мақсаттар жөнінде пікір білдірді. Өзіне қойылған көп сұрақтың ішінде Президенттің отаншылдық дегенді қалай түсінетінін айтқаны маған қатты ұнады.
Айтуынша, отаншылдық деген ұлы сезім жылтырақ сөзбен, жалған әрекетпен бағаланбауы тиіс. Нағыз отаншыл азамат жұрттың алдында кеудесін соғып көпірмейді, етегі жасқа толып еңіремейді, оңды-солды сұхбат беріп ділмәрсімейді. Үндемей жүріп, үлкен іс бітіреді. “Айдағаны бес ешкі, ысқырығы жер жаратынның” бәрі патриот емес. Отаншыл болу – туған еліңнің, отбасыңның игілігі үшін аянбай еңбек ету деген сөз. Қоқысты жинау, тал егу, табиғатты аялау, үлкенге құрмет, кішіге ізет көрсету де – отаншылдықтың белгісі екенін айтты.
Ол аймақтарға іссапармен барғанда инженерлермен, жұмысшылармен, мұғалімдермен, дәрігерлермен, шаруалармен, әскери қызметшілермен, мәдениет қайраткерлерімен кездесетінін жеткізді. «Олардың бәрі – сүйікті Отанымыздың нағыз патриоттары. Отан отбасыңнан, аулаңнан, көшеңнен басталады. Сондықтан, айналаңды аялап, табиғатты таза ұстау керек», деді Президент.
Естеу БАЙЖҰМАЕВ,
табиғат жанашыры,
Қарақыстақ ауылы, Жамбыл ауданы
