Қазақстан Республикасының Президенті Қасым-Жомарт Тоқаевтың «Түркістан» газетіне берген сұхбатымен толық танысып шықтым. Мемлекет басшысы бұл жолғы әңгімесінде халықтың әлеуметтік жағдайына қатысты мәселелерге айрықша тоқталыпты. Әсіресе, сыбайлас жемқорлық пен оған қарсы қолданылып жатқан іс-шараларға деректер келтіргені, мемлекеттің дамуына кедергі болып отырған мәселені орынды сынға алғаны, лайықты бағыт-бағдар ұсынғаны орынды деп ойлаймын.
“Сыбайлас жемқорлықпен барлық деңгейде күресі мемлекеттік сакясаттың басым бағыты болып қала береді. Бұған қатысты ешқандай күмән тумауы тиіс. Қабылданған шешім қатардағы жемқорларды ғана емес, қылмыстық әрекеттің идеологтары мен ұйымдастырушыларын да жауапқа тарутға мүмкіндік береді. Сонымен қатар қылмыстың алдын алу үшін түсіндіру және ағарту жұмыстарына әдеттегідей айрықша назар аударылады. Жалпы, жемқорлықтан аулақ болу қажеттігін балалардың құлағына жастайынан құя берген жөн. Бұл жерде мектептер, қоғамдық ұйымдар, белсенді азаматтар, әсіресе, ата-аналар шешуші рөл атқаруы тиіс. Сол кезде елімізде жең ұшынан жалғасқан жемқорлыққа мүлдем төзбеу мәдениеті қалыптасады” – деген пікірі көптің ойында жүрген күрмеулі мәселенің түйінін дөп басқандай әсерге бөлегені анық. Шынында да мемлекет дамыса, қоғамдық үдеріс те алға қарай тоқтаусыз қадам басатыны, мұның өзі ел дамуына, халықтың тұрмыстық жағдайының көтерілуіне жол ашатыны анық. Мемлекет басшысының сыбайлас жемқорлықты жоюға қатысты көтерген мәселелерін уақыт өткізбей қолға алуға Қазақстанның әрбір азаматы мүдделі болғаны абзал деген ойдамын. Мемлекет басшысының сұхбатында айтылған еліміздің ішкі, сыртқы ахуалына қатысты мәселелерді толығымен қолдаймын.
Мүтәліп СТЫБЕКОВ,
Т.Жанұзақов атындағы орта мектептің директоры,
Райымбек ауданы
