Қапшағай су қоймасында бір отбасы мінген қайық суға батып кете жаздады. Құтқарушылар дер кезінде көмек көрсетіп, 8 адамды аман-есен жағаға жеткізді. Бұл туралы Алматы облысы ТЖД баспасөз қызметі хабарлады.
«15 шілдеде сағат 17:50-де профилактикалық патрульдеу кезінде облыстық ТЖД жедел-құтқару жасағының құтқарушылары Қапшағай су қоймасының қалалық жағажайында 2 ересек адам мен 6 баланы құтқарды. Олар катамаранмен жүзіп, жағадан бір шақырымдай қашықтыққа алыстап, өз бетінше орала алмады», – делінген хабарламада.
Қайықтың іші суға толып, адамдарды үрей билеген. Жедел-құтқару жасағы дер кезінде қимылдап, отбасына көмек көрсетті.
4 құтқарушының күшімен 8 адам құтқарылды. Бүкіл отбасы жағаға жеткізілді. Медициналық көмекке мұқтаж емес.
Айта кетейік, дәл сол күні Қапшағайда ТЖД жедел-құтқару жасағы суға батып бара жатқан тағы бір ер адамды аман алып қалды. Ол шомылуға тыйым салынған белгіні елемей, суға түсуге әрекеттенген.
ТЖД азаматтардан судағы қауіпсіздік ережелерін сақтауды және балаларды қараусыз қалдырмауды ескертеді.
