Ата Заңымызға енгізілетін өзгерістер жайы кім-кімді болса да алаңдатпай қалмайды. Ақсақал ретінде мені де болашақ ұрпағымыздың келешегі ойландырмай қоймайды. Талай тауқымет тартқан еліміз тәуелмсіздігін алып, ғасырлар бойғы арманына жетіп, бүгінде әлемге әйгіленді. Алдағы уақытта да еліміз осындай мдаму қарқынынан таймаса екен деген арманым бар. Біз асарымызды асадық, жасарымызды жасадық. Енді тек артымыздан ерген ұрпағымыз бейбіт заман құшағында өмір сүрсе екен. Егемен еліміздің басына бонған бақ құсы мәңгі тұрақтап тұса екен. Бұл – менің арманым.
Тәуелсіздікке қол жеткізген қаншалықты қиын болса, оны ұстап тұру одан да ауыр. Сондықтан заман көшінен, қоғам талабынан кем қалмай, өмір ағынымен, жаһандық дамумен біздің еліміз де өрге жүруі керек. Сол себепті де Ата Заңымызға түзетулердің қажеттігін білдік әрі оған түсіністікпен қарадық.
Бірнеше күннен бері Конституциялық комиссия отырыстары тікелей эфир арқылы көрсетілуде. Осыған аса қатты қуандық. Үйде отырып, толықтай тыңдап шықтым. Елдің назарынан тыс болмай, осылай ашық әрі әділ отырыстың өткенінен риза болдым. Бүгінгі отырыста Республикалық адвокаттар алқасының Төрағасы Мәди Мырзағараевтың айтқан ойы көңілімнен шықты. Бұл отырыстың формальды емес, мазмұнды, жабық форматта емес, ашық өткенін айта келе Конституцияға енгізіліп отырған өзгерістерді жіг-жігімен талдап, талқылағандықтарын жеткізді. Заманның, қоғамның талабына сай өзгертілгендіктен жаңа Ата Заң мәселесін қарауды ұсынды. Бұл да орынды пікір деп есептеймін. Себебі қандай жағдайда да еліміздің бас құжаты Ата Заңымыз елдің елдігін, халдықтың бірлігін, қазақтың теңдігін қорғауы керек. Ұлттығымызды ұлықтап, тілімізді төрге оздырып, құндылықтарымызды әспеттеуіміз қажет. Міне, жаңа Ата Заң қазақтың тәуелсіздігін қорғап, мәңгілік азаттықтың алып қорғанына айналса екен деп аңсаймын. Лайым солай болғай.
Жәнет Сәдіұлы,
Ұйғыр аудандық ақсақалдар кеңесінің төрағасы
