Алматы облысының құтқару қызметі нөсер жауыннан кейін қалыптасқан төтенше жағдайды бақылауда ұстап отыр және су басқан ауыл тұрғындарына көмек көрсетіп жатыр.
21 шілде күні облыста нөсер жауын жауып, салдарынан үш ауданда бірнеше ауылда аулаларды су басып, сел жүрген. Алматы облысының әкімі Марат Сұлтанғазиевтің тапсырмасымен төтенше жағдай салдарын жою жөнінде жедел штаб құрылды.
Жамбыл облысының Шиен ауылында 138 үйдің ауласын су басқан, оның 10-ында жертөлеге жиналған су сорғымен шығарылған, қалған аулаларда су жерге сіңіп кеткен. Осы ауданның Қараарша ауылында беткейден аққан тасқын су көлік жолынан өтіп, газ құбырын зақымдаған.
Талғар ауданында нөсер жауыннан Талғар өзенінде су деңгейі көтеріліп, сел жүрген. Осыған байланысты Талғар бөгетінің жоғары жағында орналасқан “Спутник” лагерінен 250 бала эвакуацияланып, бір күннен соң лагерьге қайта жеткізілген.
Қарасай ауданында көпқабатты үйдің шатыры ұшып кеткен, ал Қонаев қаласына жақын Заречный кентінде бөгетті су шайған. Төтенше жағдай салдары бір күннің ішінде жойылып, 22 шілде күні таңертеңге дейін жағдай тұрақтанған.
