2026 жылғы 12 ақпанда Қаскелең қаласындағы Жастарға қызмет көрсету орталығының акт залында аудан жастарының қатысуымен «Азаматтылықты тәрбиелеу: Жаңа Конституция жастардың азаматтық жауапкершілігі мен белсенді ұстанымын қалыптастыруға қалай ықпал етеді» тақырыбында кездесу өтті.
Іс-шараның негізгі мақсаты – жастар арасында азаматтық жауапкершілікті арттыру, құқықтық мәдениетті қалыптастыру және олардың қоғамдық-саяси өмірге белсенді қатысуын ынталандыру.
Іс-шараға Қарасай ауданы ардагерлер ұйымының төрағасы С. Мәсімақынова, Кәсіподақ ұйымының төрағасы С. Жылқыбаев, Қоғамдық кеңестің мүшесі А. Абдрахманова, Қоғамдық келісім және даму орталығының басшысы Д. Утемисов, жастар ұйымдарының өкілдері, студенттер және белсенді жастар қатысты. Кездесу барысында жаңа Конституцияның қоғам өміріндегі маңызы, оның жастардың құқықтық санасын дамытудағы және азаматтық белсенділігін арттырудағы рөлі жан-жақты талқыланды. Қарасай ауданы ардагерлер ұйымының төрағасы, ардагер ұстаз Сағат Мәсімақынов жастарға білім саласында да өзгерістер болғандығы, соның ішінде: «Енді міндетті білім беру тек орта емес, бастауыш деңгейді де қамтиды, ал білім беру жүйесі нақты түрде зайырлы деп айқындалды» деп өз сөзінде түйіндеді.
«34-бап. Онда: “Қазақстан Республикасының азаматтары табиғатты сақтауға, табиғи байлыққа қамқорлықпен қарауға міндетті” деп нақты көрсетілген. Құрметті жастар, енді барлығымыздың табиғатты қорғау және айналаны таза ұстау міндетіміз Ата заңымызбен бекітілді», – деп Қарасай ауданы Қоғамдық келісім және даму орталығының жетекшісі Дидар Утемисов ерекше атап өтті. Қатысушылар өз пікірлерімен бөлісіп, ел болашағы жолындағы жастардың жауапкершілігі туралы ойларын ортаға салды.
. Кездесу ашық диалог форматында өтіп, қатысушылар тарапынан қойылған сұрақтарға жауаптар берілді.
Ұйымдастырушылар мұндай кездесулер алдағы уақытта да жалғасатынын атап өтті.
