Тәуелсіз, егемен елдің жастары білімді, тәрбиелі болса екен деймін. Бүгінгі бейбіт тірлігіміз үшін кең-байтақ жерін қанымен қорғап, ұрпағына аманаттап қалдырған батыр бабаларымыздың аруағы алдында қашанда қарыздармыз. Біздің алдымызда ұрпақтар сабақтастығын үзіп алмау міндеті тұр.
«Балаңды өз білгеніңмен емес, өз ұлтыңның тәрбиесімен тәрбиеле» деген тәмсіл бар дана халқымызда. Сан ғасырлар бойы сұрыптаудан өткен ұлттық құндылықтарымызды көздің қарашығындай сақтап, рухани байлықпен өскелең ұрпақты сусындатуды ешқашан естен шығармаған абзал. Жастардың бойына ерлік рухты, отаншылдық сезімді сіңіру – көпке ортақ абыройлы іс. Еліміз өркениет көшінен қалмай, әлемде ойып тұрып өз орнын алуы үшін жалпыадамзаттық ізгілікпен қатар, ұлттық тәрбиені де биікте ұстауымыз керек.
Даңқты қолбасшы Бауыржан Момышұлы: «Біздің тарихымыз – батырға бай тарих, халқымыз батырлықты биік дәріптеп, азаматтық пен кісіліктің символы санаған. Батырлық, ерлік ұрпақтан-ұрпаққа атадәстүр болып қала бермек. Өткенін білмеген, тәлім-тәрбие, ғибрат алмаған халықтың ұрпағы – тұл, келешегі – тұрлаусыз», – деген. Ерлік, дәстүр, отансүйгіштік рух – тәуелсіз еліміздің әлемдік қауымдастықтан лайықты орын алуына мүмкіндік беретін бірден-бір күш.
Ата-бабаларымыз баланы бесіктен жақсылыққа баулыған. «Үлкенді сыйла, сəлем бер, жолын кесіп өтпе» деген секілді ұлғатты сөздердің мəні терең. Бала кісілікті, адамгершілікті, әдептілікті, сыпайылықты, тіпті өрескел мінез бен бұзақылықты да алғаш өз отбасында көреді. Бұл орайда: «Ұяда не көрсең, ұшқанда соны ілерсің» деген халқымыздың даналық сөзі отбасы тәрбиесінің қаншылықты маңызды екенін көрсетеді. Патриоттық сезімнің қалыптасуына ең алдымен ата-ана ықпал етеді. Отанды сүю отбасынан басталатыны сондықтан. Сонымен қатар ауыл-аймағының тигізер әсері де үлкен. Сондықтан да бала тәрбиесі – баршамызға ортақ маңызды міндет десек, еш қателеспейміз. Қоғам бұл іске парасаттылықпен қарап, байсалдылықпен жұмыла білуі тиіс. Жас ұрпаққа ұлттық тәрбие үлгісін ұғындыру – қазіргі заман талабы және қоғам қажеттілігі.
Сөзімді түйіп айтсам, халқымыздың тәрбие тәсілдері – сан ғасырдан бері жинақталып келе жатқан алтын қазығымыз. Сол таным ұрпақ тәрбиесінде кеңінен қолданылғаны жөн.
Қамбархан ҮМБЕТОВ,
еңбек ардагері, Жамбыл ауданының Құрметті азаматы
