Әл-Фараби атындағы Қазақ ұлттық университетінің шығыстану факультетінде Корей қоры қолдауымен жүзеге асқан халықаралық жоба аясында қазақ тіліндегі корей тілі оқулығының тұсаукесері және шәкіртақы табыстау рәсімі өтті.
Шараға Корея Республикасының Алматы қаласындағы Бас консулы Ха Тэ Ук, Korea Foundation Мәскеу қаласындағы өкілдігінің директоры И Со Мен, Кибер Хангук шет тілдер университетінің профессоры Джин Джон Ран, сондай-ақ университеттің профессор-оқытушылар құрамы, студенттер мен докторанттар қатысты.
Салтанатты жиынды Әл-Фараби атындағы ҚазҰУ-дың ғылыми-инновациялық қызмет жөніндегі проректоры Марғұлан Ибрайымов ашып, университеттің халықаралық ынтымақтастықтағы жетістіктері мен корейтану бағытының маңыздылығына ерекше тоқталды.
Соңғы жылдары университеттің шығыстану факультетінде корейтану бағытына, әсіресе корей тілін меңгеруге деген қызығушылық айтарлықтай артып келеді. Жыл сайын бұл мамандықты таңдаған студенттер саны өсуде әрі олардың басым бөлігі қазақ бөлімінде білім алады. Бұл ана тіліндегі сапалы оқу-әдістемелік материалдарға деген сұраныстың жоғары екенін көрсетеді. Осы қажеттілікті ескере отырып, өткен жылы халықаралық ынтымақтастық аясында маңызды жоба қолға алынды. Қырғызстанның Бішкек қаласында өткен «Ақпараттық технологиялар дәуіріндегі корейтану» атты XIII халықаралық ғылыми конференция барысында Корей қоры өкілдерімен жүргізілген келіссөздің нәтижесінде, қор тарапынан Қазақ ұлттық университеті баспасынан корей тілі оқулығын басып шығаруға қолдау көрсету туралы шешім қабылданды. Бұл бастама Корей қорының әлемде корейтануды қолдау және ілгерілету бағытындағы стратегиялық мақсатына толық сәйкес келеді.
Университет серіктесі ретінде Кибер Хангук шет тілдер университеті өз оқу құралын басып шығаруға және баспа құқығын ұсынуға келісім берді. Сонымен қатар Хангук шет тілдер университетінен жіберілген профессор Сон Ю Джоң жобаның мазмұндық және академиялық сапасын қамтамасыз етуге елеулі үлес қосты. Нәтижесінде 2025 жылдың қазан айында Korea Foundation Мәскеу қаласындағы өкілдігінің директоры И Со Мен мен ҚазҰУ-дың ғылыми-инновациялық қызмет жөніндегі проректоры Марғұлан Қасенұлы халықаралық жобаға ресми түрде қол қойды.
Корей тілі оқулығының қазақ тіліндегі 4 деңгейлі басылымын әзірлеуге корейтану бөлімінің профессор-оқытушылар құрамы белсене қатысты. Атап айтқанда, «Корей тілі: бастапқы деңгей 1, 2» оқулықтарын Жанар Жаханова, Татьяна Пак, Бектияр Қыдырбаев, Әйгерім Ермекқызы аударса, «Корей тілі: орта деңгей 1, 2» оқулықтарын Зарипа Серікбаева, Назерке Хамитова, Әйгерім Сайлаукенова және Маржан Бегалиева тәржімалады. Филология факультеті деканының орынбасары Жайна Сәткенова мен Қиыр Шығыс кафедрасының меңгерушісі Ақерке Абаған оқу құралдарына ғылыми-әдістемелік сараптама жасады.
Шара барысында шығыстану факультетінің деканы Мырзахан Шәріпбайұлы оқу құралының маңыздылығына тоқталып, бұл Қазақстандағы корей тілін жүйелі түрде оқытуға арналған қазақ тіліндегі алғашқы кешенді оқу құралы екенін атап өтті.
Таныстырылымнан кейін оқулықтың ресми тұсаукесер рәсімі өтіп, символикалық түрде лента қиылды. Іс-шараның маңызды бөлігі ретінде 2025 жылғы Korea Foundation бағдарламасы аясында магистранттар мен докторанттарға арналған шәкіртақылар табысталды.
Ұйымдастырушылардың айтуынша, бұл жоба студенттердің корей тілін сапалы меңгеруіне мүмкіндік беріп қана қоймай, Қазақстандағы корейтану ғылымының дамуына, ұлттық білім беру кеңістігінде қазақ тіліндегі оқу ресурстарының артуына және екі ел арасындағы мәдени ынтымақтастықтың нығаюына елеулі үлес қосады.
Алма Топантайқызы
