«Есік» мемлекеттік тарихи-мәдени музей-қорығы мен Мажарстан ұлттық музейі арасында әріптестік байланыс орнату туралы меморандумға қол қойылды.
Мажарстан Ұлттық музейінің бас директоры Ласло Шимон, археолог Вера Майерек, доктор Вирагос «Есік» музейіне арнайы сапармен келді. Бұл туралы музейдің баспасөз қызметі хабарлады.
Мажарстандық меймандар музей ішін аралап, Алтын адамның, сақ-үйсіндердің, орта ғасырлық Жетісу қалаларының тарихымен танысып, музейде атқарылып жатқан ғылыми жұмыстардан хабардар болды
Сапар соңында екі музей арасында әріптестік байланыс орнату туралы меморандум жасалып, оған Венгрия ұлттық музейінің директоры Ласло Шиман мен «Есік» музей-қорығының директоры Гүлмира Мұхтарова қол қойды.
Меморандум аясында халықаралық дәрежеде экспедициялар, конференциялар, семинарлар ұйымдастыру, ғылыми ақпараттар алмасуға және музей қызметкерлерінің біліктілігін арттыру мен тәжірибе алмасу туралы уағдаластыққа қол жеткізілді.
