Университет таңдау – көпшілік ойлағандай жай ғана шешім емес. Бұл – адамның болашақ бағытын, кәсіби жолын және өмірлік көзқарасын айқындайтын кезең. Сондықтан көптеген талапкердің таңдауы Әл-Фараби атындағы Қазақ ұлттық университетіне түседі. Бұл шешімнің артында бірнеше маңызды фактор бар: сапалы білім, дамуға ыңғайлы орта және өз мүмкіндігін толық ашуға жағдай жасау.
Әл-Фараби атындағы Қазақ ұлттық университеті – еліміздің бас жоғары оқу орны және әлемдік деңгейдегі үздік 200 университеттің қатарына енген бірегей білім мекемесі. Мыңдаған жастың арманы тоғысқан, ғылым мен тәжірибе ұштасқан нағыз білім ордасы.
Бүгінгі таңда экономиканың күретамыры қаржы екені даусыз. Ал сол саланың білікті мамандарын даярлауда Әл-Фараби атындағы Қазақ ұлттық университетінің экономика және бизнес жоғары мектебі, соның ішінде «Қаржы және есеп» кафедрасы көш бастап тұр. Бұл – болашақ қаржыгерлердің, аудиторлардың және талдаушылардың шыңдалатын орны. Кафедраның басты артықшылығы – оның терең тарихы мен заманауи технологияларды ұштастыра білуінде. Мұнда студенттер тек теориялық білім алып қана қоймай, нақты өмірлік жағдайларды зерттеуге, қаржылық талдаулар жүргізуге және экономикалық шешімдер қабылдауға үйренеді.
«Ұстазы жақсының – ұстанымы жақсы». Кафедрада өз ісінің білгір маманы, еліміздің экономикасына елеулі үлес қосқан ғалымдар, практикалық тәжірибесі бар оқытушылар дәріс береді. Олар студенттерді тек оқулықпен шектемей, нарықтың нақты кейстерімен таныстырып, сыни ойлауға баулиды. Әрбір студентке жеке көзқарас, қолдау және бағыт-бағдар беру – оқытушылардың негізгі міндеті.
Студенттік өмір тек аудиториямен шектелмейді. Сонымен қатар кафедрада ғылыми-зерттеу жұмыстары да белсенді жүргізіледі. Студенттер түрлі конференциялар мен олимпиадаларға қатысып, өз білімдерін дәлелдеп келеді. Бұл олардың теориялық және практикалық тұрғыда да мықты маман болып қалыптасуына әсер етеді.
Кафедра әлемнің үздік университеттерімен тығыз байланыс орнатқан. Студенттер академиялық ұтқырлық бағдарламалары арқылы Еуропа мен Азияның алдыңғы қатарлы оқу орындарында білім ала алады. Сонымен қатар «Big Four» аудиторлық компаниялары, ұлттық банктер мен ірі холдингтер кафедра түлектерін жұмысқа алуға әрқашан мүдделі.
Осындай халықаралық деңгейдегі мүмкіндіктер мен заманауи білім беру жүйесі студенттердің кәсіби маман ғана емес, кең өрелі тұлға болып қалыптасуына негіз қалайды. Университет қабырғасында өткен әрбір күн – жай ғана оқу емес, бұл үлкен белестерге жасалған нық қадам.
Біз мұнда тек сандарды емес, сол сандардың артында тұрған үлкен мүмкіндіктерді көруді үйретеміз. ҚазҰУ қаржыгерлері – ел экономикасының ертеңгі тірегі.
Әсет Қыздарбекова,
Әл-Фараби атындағы ҚазҰУ экономика және бизнес жоғары мектебінің аға оқытушысы,
Сая Қапалбай,
Бексұлтан Бекмұратов,
Әл-Фараби атындағы ҚазҰУ қаржы және есеп факультетінің 4-курс студенттері
Лицензия № KZ89LAM00001798, 17.04.2025 ж
