Қазақ Ұлттық Университеті әл-Фараби атындағы білім беру ұйымы еліміздің рухани өмірінде ерекше орын алатын, тарихы терең, тағылымы мол, мәртебесі биік оқу орны болып табылады. 1934 жылы құрылған бұл іргелі білім ордасы қазақ халқының ұлттық мемлекеттілігін нығайтуға, отандық ғылым мен мәдениеттің дамуына өлшеусіз үлес қосып келеді. Университет негізі қаланған сәттен бастап-ақ ол ұлттық элитаны тәрбиелеудің алтын бесігі ретінде танылып, қоғамның интеллектуалдық әлеуетін қалыптастырудың басты орталықтарының біріне айналды.
Университеттің құрылуы – қазақ зиялыларының ғасырлар бойы аңсаған асыл арманының жүзеге асуы еді. Ұлттың болашағы білімді ұрпақтың қолында екенін терең түсінген қайраткерлер жоғары оқу орнын ашуды басты мақсаттарының бірі ретінде қарастырды. Осы тұрғыда ҚазҰУ-дың іргетасы қалануы тарихи маңызы зор оқиға болды. Ұлы Абай мұрасын зерттеу, қазақ тілінің байлығын сақтау мен дамыту, ұлттық тарихымызды жан-жақты зерделеу – осы міндеттер университет құрылған күннен бастап оның негізгі бағыттарына айналды.
Әл-Фараби атындағы университет уақыт өте келе еліміздің білім беру кеңістігінде сапа мен дәстүрдің, жаңашылдық пен сабақтастықтың символына айналды. Мұнда тек білім беру ғана емес, ұлттық құндылықтарды дәріптеу, жас ұрпақтың бойына отансүйгіштік пен жауапкершілік сезімін сіңіру де басты назарда ұсталады. Университет қабырғасында қалыптасқан академиялық орта студенттердің жан-жақты дамуына, олардың тұлғалық және кәсіби тұрғыда қалыптасуына зор мүмкіндік береді.
Университеттің ғылыми мектептері бүгінгі күні де өзінің беделі мен маңызын жоғалтқан жоқ. Филология, тарих, философия, құқық, экономика, физика, химия, биология және басқа да көптеген салалардағы зерттеулер халықаралық деңгейде танылып, әлемдік ғылыми қауымдастықта жоғары бағалануда. Ғалымдардың еңбектері шетелдік беделді журналдарда жарияланып, түрлі халықаралық жобалар мен бағдарламаларға қатысу арқылы университеттің ғылыми әлеуетін арттыра түсуде.
Профессорлық-оқытушылық құрамның жоғары біліктілігі – университеттің басты артықшылықтарының бірі. Олардың арасында ғылым докторлары, профессорлар, халықаралық деңгейдегі сарапшылар бар. Олар өз білімдері мен тәжірибелерін студенттерге жеткізе отырып, жаңа буын мамандарын даярлауда үлкен рөл атқарады. Сонымен қатар, студенттердің ғылыми-зерттеу жұмыстарына белсенді қатысуы, түрлі олимпиадалар мен байқаулардағы жетістіктері университеттің абыройын асқақтата түсуде.
Қазақ Ұлттық Университеті тек білім мен ғылымның ордасы ғана емес, сонымен қатар ұлттық руханиятты сақтаудың және дамытудың маңызды орталығы болып табылады. Мұнда мәдени шаралар, ғылыми конференциялар, әдеби кештер, патриоттық бағыттағы іс-шаралар жиі өткізіліп, студенттердің рухани дүниесін байытуға ерекше көңіл бөлінеді. Университет қабырғасында қалыптасқан осы рухани орта жас ұрпақты елін сүюге, ұлттық құндылықтарды құрметтеуге тәрбиелейді.
Университет түлектері еліміздің барлық салаларында – саясатта, экономикада, мәдениетте, білім беруде, ғылымда жетекші орындарды иеленіп келеді. Олар мемлекет дамуына өз үлестерін қосып, елдің өркендеуіне қызмет етуде. Бұл – оқу орнының сапалы білім беріп қана қоймай, нағыз бәсекеге қабілетті, жан-жақты дамыған тұлғаларды тәрбиелейтіндігін көрсететін нақты дәлел.
Бүгінгі таңда ҚазҰУ заман талабына сай дамып, цифрландыру, инновация және халықаралық ынтымақтастық бағыттарында да үлкен жетістіктерге жетіп отыр. Университет шетелдік жоғары оқу орындарымен тығыз байланыс орнатып, академиялық ұтқырлық бағдарламаларын жүзеге асыру арқылы студенттер мен оқытушыларға жаңа мүмкіндіктер ашуда.
Қорыта айтқанда, Қазақ Ұлттық Университеті әл-Фараби атындағы оқу орны – ұлттық білім мен ғылымның, мәдениет пен руханияттың алтын қазығы. Оның тарихы – ел тарихымен сабақтас, ал болашағы – тәуелсіз Қазақстанның жарқын келешегімен тығыз байланысты.
Г.А.Куаналиева
Әл-Фараби атындағы Қазақ ұлттық университеті
кеден, қаржы және экологиялық құқық кафедрасының меңгерушісі
Заң ғылымдарының докторы, профессор
Б Қалымбек.
әл-Фараби атындағы Қазақ Ұлттық Университеті
заң факультетінің кеден, қаржы және экологиялық құқық кафедрасының доценті