Қазіргі қоғамдағы ең өзекті мәселелердің бірі – нашақорлық. Бұл тек бір адамның ғана емес, тұтас отбасының, қоғамның және мемлекеттің болашағына қауіп төндіретін ауыр дерт. Сондықтан есірткіге қарсы күрес – әр азаматтың ортақ міндеті.
Нашақорлық адамның денсаулығын ғана емес, оның өмірлік мақсаттарын, армандарын, болашаққа деген сенімін жояды. Есірткіге тәуелділік жас ұрпақтың білім алуына, еңбек етуіне және қоғамның толыққанды мүшесі болып қалыптасуына кедергі келтіреді. Өкінішке қарай, бүгінде жастар арасында синтетикалық есірткілердің таралуы ерекше алаңдаушылық туғызып отыр.
Есірткінің зияны туралы түсіндіру жұмыстарын күшейту, жастардың бос уақытын тиімді ұйымдастыру, спорт пен салауатты өмір салтын насихаттау – нашақорлықтың алдын алудың маңызды жолдары. Әрбір ата-ана баласының тәрбиесіне ерекше көңіл бөліп, оның ортасына, қызығушылықтарына назар аударуы қажет.
Президентіміздің «Заң мен Тәртіп» қағидаты да қоғамдағы құқықтық мәдениетті нығайтуға және құқық бұзушылықтардың алдын алуға бағытталған. Есірткі айналымына қатысты кез келген заңсыз әрекет қатаң жауапкершілікке әкелетінін әр азамат түсінуі тиіс.
Біз жастарымызға дұрыс бағыт-бағдар беріп, олардың білім мен еңбекке ұмтылысын қолдау арқылы ғана нашақорлыққа қарсы тиімді күрес жүргізе аламыз. Салауатты өмір салтын таңдау – жарқын болашақтың кепілі.
Нашақорлыққа қарсы күрес – бір күндік науқан емес, ол қоғамның тұрақты назарын қажет ететін маңызды міндет. Сондықтан барша азаматтарды есірткіге қарсы күресте белсенді болуға және болашақ ұрпақтың амандығы үшін ортақ жауапкершілік танытуға шақырамын.
Нашақорлыққа жол жоқ! Болашағымызды бірге қорғайық!