Соңғы жылдары интернеттің дамуы мен цифрлық қызметтердің кеңінен қолданылуына байланысты алаяқтықтың жаңа түрлері көбейді. Бүгінде алаяқтар өзін банк қызметкері, құқық қорғау органы өкілі, ұялы байланыс операторы немесе мемлекеттік мекеме қызметкері ретінде таныстырып, азаматтардың жеке мәліметтері мен ақшасын заңсыз иемденуге әрекет етеді. Сондықтан қаржылық және цифрлық қауіпсіздікке ерекше мән беру – уақыт талабы.
Кибералаяқтар түрлі психологиялық тәсілдерді қолданады. Олар азаматтарды қорқытып, шұғыл шешім қабылдауға итермелейді немесе жалған ұтыс, жеңіл несие, тиімді инвестиция мен жоғары табыс уәде етеді. Мұндай жағдайда асығыс әрекет етпей, ақпараттың шынайылығын бірнеше дереккөз арқылы тексеру маңызды.
Мамандар ешкімге банк картасының нөмірін, CVV кодын, SMS арқылы келген бір реттік құпия сөзді немесе жеке кабинетке кіру деректерін бермеуге кеңес береді. Сондай-ақ күмәнді сілтемелерге өтпеу, белгісіз қосымшаларды жүктемеу және құрылғылардың қауіпсіздік жүйесін үнемі жаңартып отыру қажет.
Егер бейтаныс адам өзін банк немесе мемлекеттік орган қызметкері ретінде таныстырса, әңгімені тоқтатып, мекеменің ресми байланыс арналары арқылы ақпаратты өзіңіз нақтылаған жөн. Бұл қарапайым әрекет қаржылық шығынның алдын алуға көмектеседі.
Алаяқтықтың құрбаны болған немесе күмәнді жағдайға тап болған жағдайда уақыт оздырмай құқық қорғау органдарына хабарласу қажет. Жедел әрекет ету кей жағдайда қаражатты қайтаруға және қылмыскерлерді анықтауға мүмкіндік береді.
Цифрлық технологиялар дамыған сайын жеке ақпаратты қорғау әр азаматтың жауапкершілігіне айналып отыр. Қырағылық танытып, тексерілмеген ақпаратқа сенбеу және қарапайым қауіпсіздік ережелерін сақтау арқылы алаяқтардың арбауына түсуден сақтануға болады.