Зорлық-зомбылық – адамның өміріне, денсаулығына және қадір-қасиетіне қауіп төндіретін ауыр құқық бұзушылықтардың бірі. Ол физикалық күш қолданумен ғана шектелмей, психологиялық қысым көрсету, қорқыту, экономикалық тәуелділікке мәжбүрлеу және кибербуллинг сияқты түрлі нысандарда кездеседі. Сондықтан зорлық-зомбылықтың алдын алу – мемлекет пен қоғамның ортақ міндеті.
Отбасындағы зорлық-зомбылық – ең өзекті мәселелердің бірі. Мұндай жағдайлар тек жәбірленушіге ғана емес, балалардың психологиялық дамуына да кері әсер етеді. Балалар қатыгездікке куә болған кезде олардың бойында қорқыныш, сенімсіздік және агрессия қалыптасуы мүмкін. Сондықтан отбасында өзара сыйластық пен түсіністік мәдениетін қалыптастыру аса маңызды.
Зорлық-зомбылықтың алдын алуда құқық қорғау органдары, білім беру мекемелері, денсаулық сақтау ұйымдары және қоғамдық бірлестіктер бірлесіп жұмыс жүргізуде. Тұрғындар арасында түсіндіру шаралары өткізіліп, құқықтық сауаттылықты арттыруға бағытталған кездесулер ұйымдастырылуда. Сонымен қатар жәбірленушілерге психологиялық және құқықтық көмек көрсетілуде.
Егер сіз немесе жақыныңыз зорлық-зомбылыққа тап болса, үндемей қалмаңыз. Уақытылы көмек сұрау – өз қауіпсіздігіңізді қорғаудың ең дұрыс жолы. Құқық қорғау органдарына жүгіну және арнайы көмек көрсету орталықтарының қызметін пайдалану мәселені шешуге мүмкіндік береді.
Әрбір азамат зорлық-зомбылыққа бейжай қарамай, заң талаптарын құрметтеп, қоғамда өзара сыйластық пен адамгершілік құндылықтарды нығайтуға үлес қосуы тиіс. Қауіпсіз қоғам – әр адамның жауапкершілігінен басталады.