Құрылтай – елдің тағдырына қатысты маңызды шешімдер қабылданатын, халықтың үні мен пікірін біріктіретін ерекше алаң. Бүгінде бұл дәстүр жаңа мазмұнға ие болып, қоғамның барлық саласының дамуына серпін беретін маңызды институтқа айналып отыр.
Жастар – кез келген мемлекеттің қозғаушы күші, елдің ертеңі. Сондықтан Құрылтайда қабылданатын бастамалар мен шешімдер жастардың сапалы білім алуына, жұмыспен қамтылуына, кәсіпкерлікпен айналысуына, тұрғын үй мәселесін шешуіне және өз әлеуетін толық жүзеге асыруына тікелей ықпал етеді.
Бүгінгі жас буын тек өз болашағына ғана емес, елдің дамуына да жауапкершілікпен қарайды. Қоғамдық бастамаларға белсенді қатысып, жаңа идеялар ұсынып, туған жердің өркендеуіне үлес қосу – әрбір жастың азаматтық борышы. Құрылтай осы мүмкіндіктерді кеңейтіп, жастардың дауысының естілуіне жол ашады.
Жастар ұйымдарының басты мақсаты – белсенді, білімді, отаншыл әрі жауапкершілігі жоғары азаматтарды қалыптастыру. Бұл бағыттағы жұмыстар Құрылтайда көтерілетін басымдықтармен үндеседі. Себебі мемлекетіміздің тұрақты дамуы жастардың белсенділігіне, жаңашылдығына және білім деңгейіне тікелей байланысты.
Әрбір жас өз таңдауына бейжай қарамай, елдің қоғамдық-саяси өміріне белсенді қатысуы қажет. Өйткені бүгін қабылданған шешімдер ертеңгі Қазақстанның келбетін айқындайды. Бірлік пен жауапкершілік қана мемлекетімізді жаңа белестерге жетелейді.
Құрылтай – бұл тек маңызды саяси алаң ғана емес, жастардың арманы мен мақсатына жол ашатын, елдің жарқын болашағын бірге қалыптастыратын орта. Сондықтан әрбір жас өз азаматтық ұстанымын танытып, ел болашағына бейжай қарамауы тиіс. Болашақ – біздің қолымызда, ал оны бірге құру – баршамыздың ортақ міндетіміз.
Даутқан Тоқжан Мейрамбекқызы Алатау қаласы жастар ресурстық орталығының жетекшісі