Алматы облысының жалпы білім беретін мектеп оқушылары арасында «Жыр алыбы – Жамбыл» атты республикалық жас ақындар айтысы басталды. Байқау жыр алыбы Жамбыл Жабаевтың шығармаларын мектеп оқушылары арасында кеңінен насихаттау, шығармашылық талантын байқап, суырып салма қабілеттерін анықтау мақсатында өткізіліп отыр. Байқауда жас ақындар тақырыптық және қайым айтыс бойынша сөз сынға түседі. Тақырыптық айтыста жас ақындар Жамбыл Жабаевтың өмірі мен шығармашылығын, сондай-ақ елдегі жалпы жағдайды жырға қосуы керек.
Сондай-ақ ақындар бір-бірімен мазмұнды диалог жүргізе білуі де қажет. Ал қайым айтыста шарт бойынша бірінші бастаған ақынның өлеңін қарсыласы ұйқасын бұзбай, алғашқы екі жолын мағыналық тұрғыда ғана сәл өзгертіп, немесе сол қалпында сақтап соңғы екі жолымен жауап қайтаруы тиіс.
Республикалық жас ақындар айтысында топ жарған жеңімпаздар мен жүлдегерлер айтыстың екі түрі бойынша Оқу-ағарту министрлігінің Бас жүлде және I, ІІ, ІІІ дәрежелі дипломдармен марапатталады. Сондай-ақ қатысушыларға Есенқұл Жақыпбеков, Есдәулет Қандеков, Әлімқұл Жамбылов, Үмбетәлі Кәрібаевтың арнайы жүлделі дипломдары беріледі.
Alatau News
