Алматы облысының әкімі Марат Сұлтанғазиев өңір ұстаздарын 5 қазанда атап өтілетін Мұғалімдер күнімен құттықтады.
Сіздерді Мұғалімдер күнімен шын жүректен құттықтаймыз! Ұлт ұстазы, өткен ғасырдағы қазақ руханиятының көшбасшысы Ахмет Байтұрсынұлы: “Мектептің жаны – мұғалім» деп айтып кеткен. Арада бір ғасыр өтсе де, Алаш арысының бұл сөзі, әлі күнге төрімізден түскен жоқ.
Ұрпақтың ұлы мұраты жолында талмай еңбек еткен, ұрпақты білім нәрімен сусындатып, адамгершілік руxта бағыт-бағдар берген ұстаздардың еңбегі зор. Сіздердің балаға деген көңілдеріңіз əр оқушының жүрегіне ізгіліктің дәнін егіп, ой-өрісін дамытып, олардың жан дүниесі мен көңіл көкжиегін нұрландыруда. Мұғалімнен өнеге-білім алып, өмір теңізіне құлаш ұрған кез келген шəкірт, ұстазымен мақтанады. «Мұғалім – мектептің жүрегі», «Бала жанының бағбаны»… Иə, бұл — ұстазға арналған теңдесі жоқ теңеулер!
Ұрпақ тәрбиесі жолында қызмет етіп келе жатқан мұғалімдердің ата-анадан кейінгі атқарар рөлі ерекше. Тәуелсіз мемлекетіміздің басты құндылығы – білімді адам. Тек өз Отанымыздағы білім үрдісімен шектеліп қалмай, әлемдік білім кеңістігіне шығу жолындағы қадамдарыңыздың өзі бәсекелестіктің бағын ашады.
Әрбір үйдің еркесінің бабын тауып, әр шаңырақтың тентегімен тіл табысатын осынау мамандықтың иелерін шын жүректен мерекелерімен құттықтап, жігерлі де намысты ұлдарымызды, инабатты да ибалы қыздарымызды білім нәрімен ғана емес, ұлттық болмыста тәрбиелей берулеріңізге тілектеспін! Адал жандарыңыз жабырқау көрмей, ақжарма көңілге кенеліп, шәкірттеріңіздің жеңісіне тебіреніп-толқыйтын, қуанышты сәттеріңіз көп болсын! Ұстаз деген ұлылықтың жылылығын тіршілікке тарата беріңіздер!”, – делінген әкімнің құттықтауында.
Қазақстанда педагогтердің кәсіби мерекесі – Мұғалімдер күні Үкімет қаулысына сай биылдан бастап 5 қазанда атап өтіледі. Елімізде Мұғалімдер күні осы уақытқа дейін қазан айының бірінші жексенбісінде тойланып келген. Енді бұл мереке 5 қазанда әлемнің 100-ден астам елі атап өтетін Дүниежүзілік мұғалімдер күнімен сәйкестендірілді.
Мұғалімдер күні – білім беру саласындағы қызметкерлердің барлығына ортақ кәсіби мереке. Бұл күні ұстаздар қауымының қоғам дамуындағы рөлі мен еңбегі, оған қосатын зор үлесі аталып өтіледі.
Оқу-ағарту министрлігінің мәліметінше, бүгінде Қазақстанда мектепке дейінгі, орта, техникалық және кәсіптік білім беру ұйымдарында 556 мың педагог еңбек етеді.
