Бүгін экономикалық ынтымақтастық аспектілерін талқылау үшін қазақстандық 200-ге жуық кәсіпкер мен шетелдік инвестор «ALATAU INVEST» халықаралық бизнес форумына жиналды. Форумды Алматы облысының әкімі Марат Сұлтанғазиев салтанатты жағдайда ашты. Оның айтуынша, бұл шара экономикалық көкжиектерді кеңейтуге және әртүрлі елдер мен компаниялар арасындағы ынтымақтастықты нығайтуға көмектесетін негізгі оқиға саналады.
«Ең маңызды факторлардың бірі – бизнес, өнеркәсіп, инфрақұрылым, өңдеу өнеркәсібі, туризм, ауыл шаруашылығы және экономиканың басқа да секторларының өкілдері арасында тәжірибе мен идеялар алмасу үшін жағдай жасау. Форум компаниялар жаңа іскерлік байланыстар орнатуға, әлеуетті инвестициялық жобаларды талқылауға және ынтымақтастық мүмкіншіліктерін талдауға мүмкіндік береді», – деді Марат Сұлтанғазиев.
Облыс басшысы өз сөзінде өңірде қолайлы инвестициялық ахуал қалыптастыру бағытында атқарылып жатқан жұмыстарға тоқталды.
«Мемлекет басшысының тапсырмасына сәйкес облыс әкімдігі экономиканың түрлі салаларында әртүрлі жобаларды іске қосу арқылы өңірдің дамуын ынталандыруға ықпал ететін инвесторлар үшін қолайлы жағдай жасап, жүктелген міндеттерді белсенді түрде жүзеге асыруда. Мемлекет инвестиция тарту бойынша шараларды белсенді қабылдауда, оның ішінде бизнес үшін рәсімдерді жеңілдету, салықтық жеңілдіктер беру, арнайы экономикалық аймақтар мен инфрақұрылымдарды құру, сондай-ақ экономиканың инновациялық секторларын қолдау», – деді Марат Сұлтанғазиев.
Өңір басшысы сөзінің соңында Алматы облысы инвестиция көлемі жағынан жаңа аймақ атана отырып, алыс-жақын елдердің іскер топтарының өкілдерімен өзара тиімді қарым-қатынастарды дамытуға ден қойғанын атап өтті. Ол дипломатиялық өкілдіктер мен консулдықтардың осы бағыттағы қолдауы үшін алғысын білдірді.
«Дипломатиялық өкілдердің қолдауы аймақтағы экономикалық қарым-қатынастарды дамытуда шешуші рөл атқарады. Елшіліктер мен консулдықтар шетелдегі іскер топтар мен Алматы облысындағы кәсіпкерлері арасында маңызды байланыстар жасайды. «Тәжірибе алмасуға, инвестиция тартуға және өңір экономикасының тұрақты өсуіне ықпал ететін бизнес үшін қолайлы жағдай жасауға белсенді атсалысқандарыңыз үшін алғыс айтамын», – деді Марат Сұлтанғазиев.
