Алматы облысында саяжай алаптарын жақын маңдағы елді мекендердің шекарасына енгізе отырып, бас жоспарларды түзету бойынша жұмыстар аяқталды. Бұл туралы өңірлік коммуникациялар қызметінің алаңында облыстық сәулет және қала құрылысы басқармасының басшысы Болат Мұсылманбеков баяндады.
Алматы облысында барлығы 674 саяжай алабы бар. Атап айтсақ, Қарасай ауданында 200, Іле ауданында 157, Талғар ауданында 152, Еңбекшіқазақ ауданында 135, Жамбыл аудандарында 21 және Қонаев қаласында 9 саяжай орналасқан.
Спикердің айтуынша, қазіргі таңда 333 саяжайды жақын маңдағы елді мекендердің шекарасына енгізе отырып, бас жоспарды өзгерту жұмыстары аяқталды. Мәселен, Іле ауданында 5 елді мекеннің бас жоспарына 109 саяжай, Қарасай ауданында 4 елді мекеннің шекарасына 88 саяжай, Талғар ауданында 6 елді мекеннің шекарасына 92 саяжай, Еңбекшіқазақ ауданында 2 елді мекеннің шекарасына 44 саяжай алабы қосылады.
«Саяжайлардың қосылу жоспары былтырдан бері қаралып жатыр. Алдымен оларға елді мекен мәртебесі берілуі керек. Қазіргі таңда тұрғындар санын есептеп, бала-бақшалар мен мектептер саны бас жоспарға кіргізілуде. Халықпен бірге тыңдаулар өткіздік. Ұсыныстарды мәслихат шешімімен бекітіп жатырмыз», – деді Болат Аманжолұлы.
