Алматы облысында өнеркәсіптік қауіпсіздік саласы бойынша 4 мемлекеттік қызмет көрсетіледі
Өндірісте апатты оқиғалардың негізгі себептері өнеркәсіпте қауіпсіздік талаптарын сақтамаудан туындайды. Бұл туралы өңірлік коммуникациялар қызметінің ақпараттық алаңында Төтенше жағдайлар министрлігі Алматы облысы бойынша өнеркәсіптік қауіпсіздік комитеті департаментінің салааралық бақылау және қадағалау бөлімінің басшысы Ерлан Қадыров баяндады.
Аталған департамент ҚР “Азаматтық қорғау туралы” Заңына сәйкес мемлекеттік қызметтің төрт түрін ұсынады. Атап айтсақ, есепке қою және есептен шығару, қауіпті өндіріс нысанын салуға, реконструкциялауға, жоюға арналған жобалау құжаттамасын келісу істері атқарылады. Сонымен қатар, жарылыс жұмыстарын жүргізуге рұқсат беру, емтихан алатын комиссия мүшелерінің білімін тексеру де ТЖД-ның салааралық бақылау және қадағалау бөлімінің құзырында.
Спикердің айтуынша, былтыр қауіпті өндіріс нысандарын салуға, кеңейтуге, реконструкциялауға қатысты 117 жоба қаралып, көпшілігіне (103 жобаға) рұқсат берілді. Ал, техникалық құрылғыларды есепке қою және есептен шығару бойынша департаментке 983 өтініш келіп түссе, 27 өтініш бұрғылау-жару жұмыстарын жүргізуге қатысты болған.
ҚР Азаматтық қорғау туралы Заңының 79-бабына сәйкес, өнеркәсіптегі қауіпсіздікті декларациялайтын заңды тұлғалардың басшылары мен заңды тұлғалардың тұрақты жұмыс істейтін емтихан комиссияларының мүшелері уәкілетті орган белгілеген тәртіппен үш жылда бір рет емтихан тапсырып, нәтижесіне қарай сертификат алып отырады.
Ерлан Қадыровтың сөзінше, 2023 жылы және биыл жыл басынан бері облыс бойынша өнеркәсіптегі қауіпсіздікті қамтамасыз етуге қатысты мемлекеттік қызмет көрсету кезінде заң бұзушылықтар тіркелмеген.
Еске салайық, қызметтерді алу үшін өтініштерді “электрондық үкіметтің” веб-порталы арқылы жіберуге болады.
