Өмірде неше түрлі жағдайлар кездеседі. Ел басына қиындық туған оқиғалар болады. Біз бүгін соның куәсі болып отырмыз. Он облыстың аумағында қарғын судың кесірінен тасқын күшейіп, апатты жағдай орын алды. Барша қазақтың қабырғасы қайысты. Ағайындар мал-мүлкінен айырылып, толарсақтан су кешкенде олармен бірге күйзелмеу мүмкін емес. Қазір Қазақстан халқы бір кісідей жұмылып, көмек қолдарын созуда. Бұл сындарлы кезеңнен де өтіп, қиындықтың артта қалатыны анық.
Мемлекет басшысы Қасым Жомарт Тоқаевтың халыққа арнаған үндеуінде: «Бұл –табиғи апат. Мұндай ахуал ұзақ жылдан бері болмаған. Бұл көлемі жағынан соңғы 80 жылдан бергі ең ірі табиғи апат деуге болады», – деді. Оны тізгіндеу үшін барлық күш бір-бірімен иықтасқан жағдайда қарқынды қимылдауда. Мемлекет басшысының айналасына топтасқан қалың бұқара ынтымақ-бірлікке ден қойып, ортақ мақсатқа жұмылды. «Жағдай өте күрделі болса да, біз қиындықты міндетті түрде еңсереміз, барлығын қалпына келтіреміз» деген үндеу жолдары адамдарды қолтығынан сүйеп дем бергендей.
Қасым-Жомарт Кемелұлы «Мемлекет бірде-бір адамды ескерусіз қалдырмайды» деді. Шаршап жүрген жандардың көкірегіне үміт ұялатты. Меніңше, үндеу – көңіл жұбатқан тіркестер ғана емес, ол – нақты жүзеге асатын жоспар. Мен саяси құжаттың мазмұнын осылай түсіндім.
Тоқан Ботабеков,
Алматы облыстық Қоғамдық кеңесінің мүшесі,
«BTK GROUP» компаниясының директоры
