Бүгінде еліміздің он аймағында төтенше жағдай жарияланды. Атап айтқанда, Абай, Ақмола, Ақтөбе, Атырау, Батыс Қазақстан, Қарағанды, Қостанай, Павлодар, Солтүстік Қазақстан, Ұлытау облыстарында қауіп бұлты әлі сейіле қойған жоқ.
Халқымыз ежелден от пен суды «Тілсіз жау» деп атаған. Ауа-райының күрт жылынып, қалың жауған қар жылдам еріп, жауын-шашын көлемінің мол болуынан қарғын су аталған өңірлерді басып қалып, тұрғындарды әбігерге түсірді. Осындай сын сағатта ел Президенті Қасым-Жомарт Тоқаев Қазақстан халқына үндеу жариялады. Мұндай ахуалдың ұзақ жылдан бері болмағанын, мұны көлемі жағынан соңғы 80 жылдағы ең ірі табиғи апат деп бағалаған Мемлекет басшысы қазақстандықтарды табиғи апаттың салдарымен бір жағадан бас, бір жеңнен қол шығара отырып, күресуге шақырды. Қасым-Жомарт Кемелұлы жұртшылықты табиғи апаттың салдарымен бірлесіп күресуге шақырды.
«Тілсіз жауды» ауыздықтау мен оның зардабын жою бағытындағы жұмыс күшейіп, Премьер-Министр басқаратын республикалық штаб құрылды. Баспанасы, дүние-мүлкі судың астында қалған тұрғындарға көмек көрсетілуде.
Расында, апат аталған өңірлердегі халықтың ғана емес, барша қазақстандықтардың басына түскен қиындық екені анық. Осыны жақсы түсінген еліміздің барлық аймағының тұрғындары, қиындық құрсауында қалған ағайынға шама-шарқынша қол ұшын созуда. Бұл игілікті іске Алматы облысының тұрғындары да атсалысып жатқанын атап өткен жөн.
Бұрын да талай қиын-қыстауды басынан өткерген халқымыз ауызбіршілігінің арқасында бұл ауыртпалықты да бірге еңсеретіні сөзсіз. Тек сабыр сақтап, төзімділік танытып, ел бірлігіне сызат түсірмеуіміз керек. Мемлекет басшысы айтқандай, жалған ақпараттың жетегінде кетер болсақ, ел тыныштығына қауіп төнуі ықтимал. Баянды тірлікке бірліктің арқасында қол жеткізе аламыз. Сондықтан ресми ақпарат көздерінің адастырмайтынына жұртшылықтың назарын аударғым келеді.
Қалижан Алпысбаев,
Алматы облыстық ішкі істер басқармасы тәлімгерлер кеңесі төрағасының орынбасары, ішкі істер саласының ардагері,
Қонаев қаласының Құрметті азаматы
