Алматы облысы әкімінің өкімімен 2024 жылғы 8 сәуірден бастап Қуанышбек Мирамбекұлы Алматы облысы туризм басқармасының басшысы лауазымына тағайындалды. Бұл туралы облыс әкімдігінің баспасөз қызметі хабарлады.
Қуанышбек Мирамбекұлы 1993 жылы Алматы облысы Іле ауданында туған.
Жоғары білімді, 2012 жылы Сеул Кангнам университетінде адам ресурстарын басқару бағдарламасы бойынша курстан өткен, 2013 жылы Бамберг Отто-Фридрих университетінде алмасу бағдарламасы бойынша оқыған, 2015 жылы Тұрар Рысқұлов атындағы Жаңа экономикалық университетін «экономика және бизнес», 2016 жылы Орталық Азия университетін «заңтану» мамандықтары бойынша бітірген. “Болашақ” бағдарламасы бойынша 2022 жылы Лондон Корольдік колледжінде құқық мамандығы бойынша тағылымдамадан өткен.
Еңбек жолын 2012 жылы жеке кәсіпкер ретінде бастаған.
Әр жылдары «Хит трэвэл» жауапкершілігі шектеулі серіктестігі бухгалтерінің көмекшісі, Астана қаласы бойынша сот сараптамалары институтының сарапшысы, Қазақстан Республикасы Әділет министрлігі сот сараптамалары орталығының кадрлық, заңдық қамтамасыз ету және құжат айналымы басқармасының басшысы, Қарағанды облысы бойынша сот сараптамалары институты директорының орынбасары лауазымдарында жұмыс істеді. 2022 жылғы тамыз айынан бүгінгі күнге дейін Алматы облысы әкімі аппаратының бірыңғай персоналды басқару қызметінің басшысы лауазымында қызмет атқарды.
