«Таза Қазақстан» акциясына Қарасай ауданының жастары да белсене қатысуда. Атап айтқанда, Жарқынай Сәдуова жетекшілік ететін аудандық жастар ресурсы орталығы мүшелерінің ұйымдастыруымен тазалық жұмыстары қарқынды жүргізілуде.
Алдын ала белгіленгендей, бұл акция жеке-жеке атауы бар бес апталық шара ретінде өткізілмекші. Мысалы, 13-ші сәуірде аяқталған «Таза өлке» іс-шарасы аулалар мен үй маңындағы күл-қоқысты шығаруға бағытталған. 20-шы сәуірге дейін жүргізілетін «Киелі мекен» акциясы аудан аумағында орналасқан тарихи-мәдени ескерткіштердің айналасын абаттандыруға арналады. «Жасыл аймақ» деген атау алған үшінші аптада негізінен көгалдандыру, жас көшеттерді отырғызып, талдардың діндерін әктеу жұмыстары қолға алынады. Ал «Өнегелі ұрпақ» акциясы мамыр айының 4-не дейін жалғасып, мұнда жастар ардагерлер тұратын ауланы тазалауға көмектесіп, қарттар үйінің аумағын абаттандыруды жоспарлап отыр. Ең соңындағы «Мөлдір бұлақ» деп аталатын бесінші аптада аудан арқылы ағып өтетін өзендер арнасын тазартады.
– Еліміз бойынша бастау алған «Таза Қазақстан» республикалық акциясының бірінші аптасын біз «Менің спорт алаңым» деп атап, балалар алаңы мен воркауттардың айналасын ретке келтіруге бағыттадық, – дейді Жарқынай Сәдуова.
Тазалық жұмыстарына Қарасай ауданында орналасқан «Аяжан Қарасай» медициналық колледжі мен Санжар Жандосов атындағы Қаскелең кәсіптік-техникалық колледжі студенттерінен құрылған еріктілер де өз үлестерін қосуда. Санжар Жандосов атындағы кәсіптік-техникалық колледжінің 2-курс студенті Батырбек Өтениязов еріктілер тобының белсенді мүшелерінің бірі.
– Мен өлкемізде «Таза Қазақстан» акциясының басталғанына өте қуаныштымын. Басқа ауылдар мен қалаларда бұл мәселе қалай шешілетінін білмедім, бірақ Қаскелең қаласында тазалық жайы қатты алаңдатады. Оның басты себебі – тұрғындар мәдениетінің төмендігі демеске амалым жоқ. Сондықтан осындай акцияларды жиі өткізген дұрыс деп ойлаймын. Оған атсалысқан әр адам қоршаған ортаға, өздері тұратын аулалар мен көшелердің тазалығына бейжай қарамайтын болады, – дейді ол.
Шара аясында алдағы уақытта «Тазалық – денсаулық кепілі!», «Мәдениет – тазалықтан басталады!» атты және басқа да іс-шаралар атқару жоспарланып отыр.
Қуат Қайранбаев,
Қарасай ауданы
