Биылғы сайлау науқанына қатысу жоғары деңгейде болады деп күтіліп отыр. Себебі 5 түрлі бюллетені бар Қазақстан Республикасы Парламенті Мәжілісінің және мәслихаттарының депутаттарын сайлау елімізде алғаш рет өткізіліп отыр.
Еске сала кетейік, дауыс беру таңғы сағат 07.00-де басталды. Іле ауданында бүгінде депуттарды сайлау үшін 88 сайлау учаскесі ашылды, оның 4-еуі жабық уческе. Алғашқы сайлаушылар сайлау учаскелерінде болып, өздері лайықты деп таныған кандидаттарына дауыс берді. Олардың кейбірі сайлау күнінің маңыздылығы туралы ойларымен бөлісті.
– Сайлау жақсы өтіп жатыр. Бүгін бәріміз үшін өте маңызды күн, біз парламент мәжілісіне және аудандық мәслихатқа өз өз кандидаттарымызды таңдаймыз. Бұл біздің Өтеген батыр ауылының тыныс-тіршілігіне жауап беретін, ауылда туындайтын барлық мәселелерді, соның ішінде сумен жабдықтау, жол сапасын арттыру, спорт алаңдарын ашу және тағы басқа маңызды мәселелерді шешетін адам. Болашақ депутат көп нәрсені жүзеге асыруы керек, ол үшін ол табанды болуы тиіс. Оған ауылдың барлық тұрғыны көмектесуі шарт. Бұл біздің ауылдың көркеюі және жайлы болуы үшін көмек болмақ. Менің ойымша, бүгін біз лайықты адамды таңдаймыз, онымен бірге біздің ауылдың игілігі үшін бірге еңбек етеміз, – деді Өтеген батыр ауылының тұрғыны Мұхтар Назарбаев.
Бағдат ЧОЙБАСОВ
Іле ауданы
