Еңбекшіқазақ ауданы әкімдігінің ұйымдастырумен, «Таза Қазақстан» жалпы республикалық акциясы аясындағы тарихи-мәдени ескерткіштерді абаттандыру жұмыстарына арналған «Киелі мекен» атты бағыт бойынша шаралар жалғасын тауып жатыр.
Аталмыш республикалық акция 5 аптаға созылып, әр аптасы белгілі бір тақырыпта өтеді. Алғашқы апта «Таза өлке» деген атаумен бастау алса, «Киелі мекен» бағыты акцияның екінші аптасында іске асырылатыны бекітілген. Аталған акция аясында Еңбекшіқазақ ауданының Түрген ауылдық округіндегі Алтын адам ескерткішінің айналасы абаттандырылып, қоқысқтан тазартылды. Сонымен бірге, жаздыгүні туристер жиі атбасын бұратын маңға 250 түп ағаш егіліп, жасыл желектің жайқалып өсуіне жағдай жасалды. Шараға қатысқан аудан әкім Талғат Ескендірұлы тұрғындарды табиғатты аялауға шақырып, туған жердің, өмір сүріп отырған ортаның әсемдігі әр адаманың іс-әрекетіне тікелей байланысты екендігін айтты. Жалпы, акцияға 150-ден аса студент, зейнеткер, ұйымдастырушылар, қоғам белсенділері мен мемлекеттік қызметкерлер қатысты.
Аудан әкімдігің ақпараты бойынша, «Таза Қазақстан» республикалық экологиялық акциясы аясында өңір аумағында 7 мың түп гүл мен ағаш егілді.
Ерзат Асыл,
Еңбекшіқазақ ауданы
