Екінші дүниежүзілік соғыстың ардагері, 98 жастағы Солтанбай Жарықбасов қария Еңбекшіқазақ ауданының Бәйтерек ауылдық округіне қарасты Алға елді мекенінде тұрады. Қарт майдангер баршаға үлгі-өнеге көрсетіп, №187 сайлау учаскесіне дауыс беруге келді. Ақсақалдың айтары аз емес екен.
– Біз, ұрпақтар бейбіт өмір сүру үшін қан майданда жаумен кескілесе шайқастық. Жеңісті жеделдетуге үлес қостық. Соғыста қыршын кеткен боздақтардың қаны босқа төгілген жоқ. Бүгін еліміз Тәуелсіз мемлекетке айналды. Көк туымыз желбіреп тұр. Мен мынаны анық білемін, Тәуелсіздікті нығайту, оған қол жеткізгеннен де қиын. Алда жүзеге асуға тиіс міндеттер шаш етектен. Бәрін қайта құру үшін күш-жігермен бірге уақыт керек. Ілгері істі алға бастыру балаларымыздың қолында. Солар үшін дауыс бердім. Алла соғыстан, апаттан сақтасын! Тыныштық қана өсіп, өркендеудің кепілі, – дейді ғасыр биігіне жақындаған Солтанбай Жарықбасов атамыз.
Еске салайық, бүгін елімізде Парламент Мәжілісі мен мәслихаттар депутаттарын кезектен тыс сайлау өтіп жатыр. Еліміз бойынша 10146 сайлау учаскесі, оның ішінде Алматы облысында 629 сайлау учаскесі ұйымдастырылған. Дауыс беру Астана уақыты бойынша сағат 20:00-де аяқталады.
Болат МӘЖИТ
Еңбекшіқазақ ауданы
