Аудан орталығы Ұзынағаш ауылындағы мектептердің бірқатарында екі сайлау учаскесінен орналасқан. Солардың бірі – жүз жылға жуық тарихы бар Тұрар Рысқұлов атындағы білім шаңырағы. Мұнда №263 және №264 сайлау учаскелері жұмыс істейді.
Мектептің спорт залында орналасқан №263 сайлау учаскесінде 2438 сайлаушы, ал негізгі корпустағы №264-учаскеде 2852 сайлаушы бүгін өз таңдауларын жасамақ. Барлығын қосқанда бұл ғимаратта ертеңгі сағат 7.00 мен кешкі 20.00 аралығында 5290 азаматтың саяси таңдауы анықталуы тиіс. Жұмыс, әрине, өте ауқымды. Жауапкершілікті сезінген екі комиссияның мүшелерінде тыным жоқ. Азаматтардың заңға сәйкес дауыс беру тәртібінің сақталуы, жеке адамның құқығының бұзылмауы үшін әр сәтті қалт жібермеуге тырысып жатқанына куә болдық.
Бұл мектепте 2239 оқушы білім алады, оларға 216 мұғалім дәріс береді. Мектеп директоры Эльмира Мақашеваның өзі №264 сайлау учаскесінің төрағасы ретінде жауапты саяси науқанның жоғары жеңгейде ұйымдастырылып, дұрыс өткізілуі үшін басы-қасында жүр. Дауыс беру үрдісін таңертеңнен бастап қалт жібермей қадағалап отырған бақылаушыларды көрдік. Олардың «Ақ жол», «Республика» саяси партияларынан, «Мұқалмас» қоғамдық бірлестігінен екенін білдік.
Дауыс беруге ертелетіп келгендердің бірі – Ұзынағаш ауылының тұрғыны Сұлу Жанқабылованы сөзге тарттық.
– Еліміздегі саяси шараға қатысуды өзімнің азаматтық парызым деп есептеймін. Еліміздің бүгіні мен болашағына немқұрайды қарамауымыз керек. Қазақ елін өркендетуге өз үлесін қосады-ау деген үміткерлерге сенім артуымыз қажет. Сол үшін өзімнің қалауымды білдіруге келіп, таңдауымды жасадым. Еліміз өркендеп, жоғары дамыған мемлекеттердің қатарына қосылса екен дейміз. Ол үшін заң шығарушы жоғарғы жақтағы және жергілікті лауазымдарға, яғни депутаттыққа білімді, іскер, отанымызға адал азаматтарды сайлауымыз керек, – дейді Сұлу Жанқабылова.
Серік САТЫЮАЛДИЕВ
Жамбыл ауданы
