Ынтымақ ауылындағы Сағындық Оспанов атындағы орта мектебінің ғимаратында орналасқан №277 сайлау учаскесінде 1313 сайлаушы тіркелген. Мұнда жастары 18-ге толған 8 азамат алғаш рет дауыс берді.
Аталған сайлау комиссиясының төрайымы Қарлығаш Нәдірбекованың айтуынша, таңғы сағат 7-де басталған саяси науқанға ең алдымен үлкендер келіпті. Дауыс берудің басталған сәтіне куә болып, алғашқы таңдауларын жасаған да ауылдың қадірлі қариялары екен. Ауыл ардагерлері бұл науқанның еліміз үшін қаншалықты маңызды екенін жақсы түсінеді. Олар тұрғындардың мұндай істен қалыс қалмай, әркім өз қалауын білдіру керектігін жастарға үнемі айтып жүреді. Бұл ретте сайлау орнына бірінші болып келулерінің өзі де сол айтқандарын ісімен дәлелдеудің бір жарқын көрінісіндей. Артта өсіп келе жатқан жас ұрпақ олардың мұнысын көріп, олар да ел тағдырына қатысты шарадан қалмауға тырысатыны сөзсіз.
Аталған сайлау учаскесіндегі бес адамнан құралған комиссия мүшелері мұнда таң бозынан келіпті. Алтыдан аса оларға тиісті бюллетендер бөліп беріліп, жұмысқа сақадай сай тұрған. Сағат жетіде комиссия келушілерді қабылдай бастады. Бұл ауылда халықтың саяси науқанға қатысу белсенділігі жоғары. Түске дейін сайлаушылардың біраз бөлігі өз таңдауларын жасап үлгерді. Аудан орталығына жақын орналасқан аядай ауылда денсаулығына байланысты үйлерінен екі сайлаушы дауыс береді. Оларға комиссия мүшелері арнайы жылжымалы жәшік ала барады.
Серік САТЫБАЛДИЕВ
Жамбыл ауданы
