Халқымыздың рухын оятып, жігерлендіре түсетін ерекше мерекенің бірі – Мемлекеттік рәміздер күні. Көк Туымыз биікте желбіреп, Әнұран әуелеп тұрғанда кез келгеніміздің кеудемізді қуаныш пен мақтаныш сезімі билейді. Өйткені рәміздер – ел еркіндігінің, егемендігі мен біртұтастығының белгісі.
Міне, сондықтан да өскелең ұрпақтың бойына отаншылдық қасиетті дарытып, жастардың ел мен жерге деген сүйіспеншілігін оятуда бұл мерекенің жөні бөлек. Осы орайда Еңбекшіқазақ ауданында мемлекеттік рәміздер күні кең көлемде аталып өтті.
Алдымен алаңда мемлекеттік Ту көтеру рәсімі болды. Салтанатқа жиналған жұрт Әнұранды асқақтата шырқап, елдік пен ерліктің әуенін әуелетті.
Мерекелік іс-шарада аудан әкімі Талғат Байеділов тұрғындар мен қонақтарды мемлекеттік рәміздер күнімен құттықтады. «Жастар тәрбиесі – жарқын болашақ кепілі. Ал ел мен жерге жаны ашитын, отансүйгіш азамат тәрбиелеу мемлекеттік нышандарды қастерлеуді үйретуден басталады. Егемен елдің көк байрағы – мызғымас мемлекеттігіміздің белгісі екенін естен шығармайық», – деген әкім бұл күн тәуелсіз еліміз үшін қандай маңызға ие екеніне тоқталды. Талғат Ескендірұлы жастар тәрбиесіне мол үлес қосып отырған ауданымыздағы Жетісу гуманитарлық колледжі, Есік кәсіптік техникалық колледжі, Есік медициналық колледжі және Есік гуманитарлық-экономикалық колледжі ұжымына алғыс білдіріп, қошеметтеді. Сонымен қатар еліміздің бірқатар өңірінде су тасқынына байланысты табиғи апат аймағындағы тұрғындарға гуманитарлық және қаржылай көмек көрсеткен аудан кәсіпкерлерін алғыс хаттармен марапаттады.
Мереке концерттік бағдарламамен жалғасып, тыңдарманның жігерін жанитын рухты әндер орындалды, аудан өнерпаздары ән-күйден шашу шашты. Жастар мен аудан спортшылары «Көк тудың желбірегені» әнімен мерекелік флэшмоб тарту етті. Сондай-ақ мерекеге орай автошеру ұйымдастырылып, Мәдениет үйінің алдынан ту көтеріп шыққан көліктер ауданымыздың мақтанышы – Есік көліне дейін жүріп өтті.
Бабаларымыз қашанда туын биік ұстап, сын сағатта байрақ астына бірігіп, тұтастығын танытқан. Халқымыз «Туың жығылмасын» деген бір-ақ сөзбен байрақтың ел өміріндегі маңызын жеткізе білген. Туымыз әркез желбірей берсін.
Құралай Мұратқызы,
Еңбекшіқазақ ауданы
