Талдықорған қаласында әлеуметтік осал топтағы және көпбалалы 60 отбасыға су жаңа пәтердің кілті табысталды.
Аталған игі шараның бастамашысы Қанат Бозымбаев Алматы облысы әкімі қызметін атқарып жүрген кезде инвесторлар тарту, қаржылық қолдау іздеу мәселелерін қолға алған. Бас демеуші – кәсіпкер, меценат Данияр Абулғазин. Қала әкімшілігінің қолдауымен салынған 60 пәтерлі тұрғын үй кешені 7-шағын ауданда орналасқан. Ал мұқтаж отбасылардың тізімін «Харекет» қорының өкілдері жасақтап беріпті. Қорға осы уақытқа дейін келіп түскен өтініштерге сәйкес жасалған тізім негізінде пәтер кезегі анықталып, салтанатты түрде кілттер табысталды.
Баспаналы болған жанұялардың қуанышында шек жоқ. Су жаңа пәтердің әрбіріне ас үй жиһазы мен тоңазытқыштар сыйға тартылды. Қазіргі уақытта тура осындай тағы екі тұрғын үй кешені салынып жатыр.
