Қонаев қаласындағы № 3 орта мектептің 8 «Ә» сынып оқушысы Мейрамгүл Ахметжан Түркияның Анталия қаласында еркін күрестен өткен «VICTORY CUP» халықаралық турнирінде 1-орынды жеңіп алды. Анадолы жеріндегі байрақты бәсекеден жеңімпаз болып оралған Мейрамгүлді ұстаздар мен оқушылар салтанатты түрде қарсы алды. Салтанатты шарада мектеп директоры Мира Абикенова, сынып жетекшісі Нұргүл Әшімова, ардагер ұстаз Гүлайым Кәрібаева, 8 «Ә» сыныптың ата-аналар комитетінің төрағасы Айгүл Кемелбаева чемпионды кезекті жеңісімен құттықтап, алдағы уақытта да әлемдік деңгейдегің спорт аламандарында топ жарыып, еліміз бен облыс абыройын асқақтата беруіне тілектестігін білдірді.
Мейрамгүл Ахметжан еркін күрестен жасөспірімдер арасында Азия бірншілігінің қола жүлдегері, Қазақстанның 2 мәрте, Алматы облысының бірнеше дүркін чемпионы. Халықаралық, республикалық жарыстар мен еліміз көлемінде өткен турнирлердің жеңімпазы.
Айжарық Көптілеуов
