Қазақстанда бүгін – 12 маусым Абай облысы аумағындағы орман өртінде қаза тапқан орманшыларды еске алатын жалпыұлттық қаралы күн. Президент Қасым-Жомарт Тоқаев кеше Абай облысына жасаған сапарында бұл күнді өрттен қаза тапқан 14 орманшыны аза тұту күні деп жариялайтынын айтқан.
«Бұл – бүкіл халқымыз үшін үлкен қасірет. Еліміздің қайғысы. Бекем болыңыздар. Орны толмас қайғы екенін түсінемін. Сіздерге жан-жақты көмек көрсету жөнінде Үкіметке тапсырма бердім. Үкіметке немесе маған жеке өтініштеріңіз болса, айтыңыздар. Барлық өтінішті орындаймыз. Қаза тапқан азаматтар қайтып келмейді. Бірақ өмір жалғасады. Осы қайғылы жағдайға кінәлілердің бәрі заң бойынша жауапқа тартылады. Дүйсенбі күнін еліміз бойынша Жалпыұлттық аза тұту күні деп жарияладым. Біз қаза тапқан азаматтарды еске аламыз. Сабыр сақтап, бекем болыңыздар. Құқық қорғау органдары мен министрліктер тарапынан болсын, барлық сала бойынша тиісті шаралар қабылданады. Қазір кеңес өткіземін. Бұл жағдайдан міндетті түрде тиісті қорытынды шығарамыз», – деген Мемлекет басшысы марқұмдардың туыстарымен кездесуінде.
Кейінірек Президент Тоқаев қаза тапқандарды мемлекеттік “Құрмет” орденімен марапаттау туралы жарлық шығарды.
Аза тұту күні еліміз бойынша барлық мемлекеттік мекемелерде тулар тұғырының ортасына дейін төмен түсіріледі. Ел аумағында көпшілік мәдени-көпшілік іс-шаралар, теларналарда, радиоларда ойын-сауық хабарлары, жарнама беру тоқтатылады.
