Қонаев қаласында биыл жазда туристер тарту мақсатында «Konaev International Ballon Festival» (KIBF) өтеді. Алматы облыстық туризм басқармасының хабарлауынша, халықаралық фестиваль шілденің 29 және 30-ы күндеріне жоспарланып отыр.
Ауқымды фестиваль ойын-сауық және танымдық бағытта өткізіледі. Оған өңірден, сондай-ақ шетелдерден туристер келеді деп күтіліп отыр. Екі күндік шараның бағдарламасы тартымды етіп ұйымдастырылмақ. Атап айтқанда, онда фотоаймақтар, шеберлер жәрмеңкесі ұйымдастырылып, театр, цирк әртістері түрлі қойылымдар қояды, спорт жарыстары, концерттер өтеді.
Фестивальдің танымдық мәнін арттыру үшін түрлі мастер-кластар өткізіледі. Шара аясында телескоп және басқа да аспан денелерін бақылау аспаптары бар жұлдызды «қалашық» құрылады. Оның жұмысына астрономия мамандары шақырылады, олар қонақтарды аспан денелерін қалай бақылауды үйретеді және қызықты пікір алмасу болады.
Фестивальдің ең тартымды тұсы әлемнің түрлі елінен әкелінген әуе шарларын ұшыру болайын деп тұр. Қонақтар олардың ұшырылуын қызықтап қана қоймай, нұсқаушының көмегімен шарларға отырып серуен де құра алады. Алматы облысының өзінде екі миллионға тарта халық тұратынын ескерсек, фестиваль ең алдымен тұрғындардың өздерін қызықтырады деген үміт бар.
Алматы облысы әкімдігі баспасөз қызметінің мәліметінше, әуелде бұл жобаға мемлекеттік бюджеттен 183 млн теңге бөлу жоспарланған. Әйтсе де «Мың бояулы аспан» халықаралық шар фестивалі коммерциялық жоба ретінде жергілікті демеушілер мен кәсіпкерлік құрылымдармен келісім жасау арқылы өткізілетін болып, қайта мақұлданды.
Фестиваль Қонаев қаласының ірі іс-шаралар мен отбасылық мерекелерді өткізетін орын ретіндегі имиджін қалыптастырады және Алматы облысында түрлі іс-шараларға құрылған туризмді ілгерілетудің маңызды құрамдас бөлігі саналады. Ол облыстың және республиканың туризмі мен экономикасын дамытуға септесу мақсатында өткізілейін деп отыр.
Оқиға мен түрлі іс-шараларға құрылған туризм – әлемде кең танылған және Қазақстанда дамып келе жатқан туристік қызметтің келешегі бар бағыты. Ол басқа туристік қызмет түрлерінің ішінде интерактивтілігімен, яғни іс-шараға адамдардың көп бөлігін тартумен, эмоционалдылығымен және тақырыптық әртүрлілігімен ерекшеленеді. Өйткені, Алматы облысы ішкі және шетелден келетін туристер саны бойынша республикада алдыңғы орында.
«Мың бояулы аспан» – азаматтардың бірлігі мен отбасылық құндылықтарды бірінші орынға қоятын фестиваль болмақ. Фестивальда аспанға алып шарлар мен батпырауықтарды ұшыру жоспарланған.
